Një ngjarje e paprecedentë ka tronditur Brukselin të dielën, kur trupi i një burri 29-vjeçar, i dyshuar me origjinë shqiptare, u gjet i varur në një tabelë rrugore pranë Qendrës tregtare Westland në Anderlecht, në kufirin me Dilbeek.
Policia belge dhe Zyra e Prokurorit Publik po hetojnë rastin, duke përfshirë pistën e vetëvrasjes, por aktualisht ngjarja po trajtohet si një akt me dhunë ekstreme.
Vendndodhja, afër qytetit të Peterbos, një zonë e njohur për trafikun e drogës, ka ngjallur dyshime për një lidhje të mundshme me bandat kriminale.
Sipas mediave belge, rastet e ngjashme në stilin e karteleve meksikane përdoren për të krijuar frikë publike dhe për të ndëshkuar rivalët.
Burime të sigurisë paralajmërojnë se Brukseli po përballet me një rritje të aktiviteteve të dhunshme të mafies, duke përfshirë rrjete shqiptare, Mocro-Mafia nga Marseja, dhe banda me origjinë nga Afrika e Veriut.
Eric Jacobs, drejtori i Policisë Gjyqësore Federale të Brukselit, ka deklaruar se kërcënimet dhe vrasjet janë vetëm “maja e ajsbergut”, dhe se ngjarjet e tilla janë pjesë e metodave brutale të mafies për kontroll dhe intimidim.
Hetimet vazhdojnë, dhe policia nuk përjashton asnjë pistë, duke përfshirë lidhjen me trafikun ndërkombëtar të drogës dhe krimin e organizuar.
