Kryetari i Lidhjes Demokratike të Kosovës, Lumir Abdixhiku, ka uruar qytetarët me rastin e 27-vjetorit të Ditës së Çlirimit të Kosovës.
Përmes një postimi në Facebook, Abdixhiku ka thënë se 12 qershori i vitit 1999 shënon fundin e vuajtjeve shekullore të shqiptarëve nën regjimin serb.
“27 vjet më parë Kosova u çlirua përfundimisht nga okupimi dhe sundimi shfarosës serb. Pikërisht më 12 qershor të vitit 1999, do të merrte fund njëherë e përgjithmonë vuajtja shekullore shqiptare nga një regjim barbar serb që po vriste e po digjte në çdo cep të Kosovës”, ka shkruar Abdixhiku.
Ai ka theksuar se liria e Kosovës është rezultat i rezistencës paqësore të udhëhequr nga Ibrahim Rugova, luftës së Ushtrisë Çlirimtare të Kosovës dhe ndërhyrjes së NATO-s.
“Rrezet e lirisë po pushtonin horizontin e zymtë të qiellit të Kosovës… Këto rreze lirie erdhën si rezultat i një rezistence paqësore të pathyeshme të udhëhequr nga Presidenti Historik, Dr. Ibrahim Rugova, dhe më pas edhe të armatosur të Ushtrisë Çlirimtare të Kosovës që rezultoi me intervenimin ushtarak të NATO-s mbi caqet serbe”, ka deklaruar ai.
Abdixhiku ka përkujtuar edhe krimet e luftës, duke theksuar se regjimi serb ka kryer vrasje, masakra dhe dëbim të popullsisë shqiptare.
“Regjimi famëkeq serb kishte vrarë e masakruar mijëra civilë të pambrojtur, kishte deportuar mbi një milion shqiptarë nga shtëpitë e tyre, kishte djegur e shkatërruar gjithçka shqiptare”, ka shkruar ai.
Ai ka shtuar se fundi i këtij regjimi erdhi pas 78 ditëve të bombardimeve të NATO-s.
Në fund, Abdixhiku ka shprehur mirënjohje për Shtetet e Bashkuara të Amerikës, Bashkimin Evropian, NATO-n dhe vendet demokratike që ndihmuan në çlirimin e Kosovës.
