Edhe pas më shumë se dy dekadash, dhimbja për banorët e fshatit Studime të Vushtrrisë, është po e njëjtë.
Për të përkujtuar të gjithë të vrarët në masakrën e kryer në këtë fshat 27 vjet më parë, këtë të shtunë u mbajtën homazhe.
E para e cila arriti aty, ishte ish-presidentja Osmani.
“Kurrë nuk do t’i harrojmë këto krime, natyrisht që kurrë nuk do t’i falim dhe, në të njëjtën kohë, kurrë nuk do të heqim dorë nga përpjekjet tona të përbashkëta për drejtësi”, thotë Osmani.
Në nder të kësaj dite, u zhvillua edhe një Akademi Përkujtimore.
E aty ushtruesja e detyrës së presidentes bëri një zotim.
“Shteti do të jetë pranë jush, jo vetëm në përvjetore. Do të jemi pranë jush në mbledhjen e dëshmive, në prokurori, në gjykatë, në arkiv, në kujtesën publike, në shkolla e në diplomaci. Këtë përgjegjësi e ndjej thellë edhe unë në detyrën që mbaj sot dhe zotohem se Studimja nuk do të mbetet vetëm në kujtimin e familjeve, por edhe në punën e përditshme të institucioneve, përfshirë të institucioneve të drejtësisë, që kriminelët e luftës të mos mbesin pa u ndëshkuar”, thotë Albulena Haxhiu.
Por familjarët e viktimave thanë se banorët e këtij fshati, kanë mbetur të harruar nga shteti.
“Kanë kaluar mbi dy dekada nga përfundimi i luftës, por ky fshat që dha aq shumë për lirinë e Kosovës vazhdon të mbetet i harruar. Mungon infrastruktura bazike: rruga, uji, kanalizimi. Mungon dora e shtetit aty ku sakrifica ishte më e madhe. Ne pyesim me të drejtë: Kush kujdeset për këtë vend? Kush është përgjegjësia institucionale për këtë fshat që dha gjithçka? Sepse nderimi i të rënëve nuk bëhet vetëm me fjalë dhe përvjetorë; nderimi i të vdekurve është respekti ndaj të gjallëve”, tregoi Diellëza Gërxhaliu, përfaqësuese e familjarëve të viktimave.
I pranishëm në akademi përkujtimore ishte edhe i pari i Vushtrrisë.
“Lavdia e tyre është e përjetshme, ndërsa përgjegjësia jonë mbetet brezave të rinj për t’u përcjellë të vërtetën për atë që ndodhi, në mënyrë që krimet e tilla të mos përsëriten kurrë”, tha kryetari Feriz Idrizi.
Disa fjalë i pati edhe i pari i Aleancës për Ardhmërinë e Kosovës, Ramush Haradinaj.
“Ne të gjallët kemi edhe detyra të tjera. Përpos me ruajt kujtesën, mos me lënë me u harru, populli thotë mos raft me u harru, që i bjen mos me leju që kurrë Kosovës me i ndodhë në të ardhmen krime e masakra e të këqija që ia ka bërë Serbia, regjimi i Millosheviçit, forcat ushtarake e paramilitare popullit të Kosovës. Si e sigurojmë veten? Së pari, po, duke e forcuar ushtrinë tonë. Duhet me e forcu vazhdimisht ushtrinë, kurrë pa u ndal. Duhet me e forcu policinë tonë vazhdimisht, kurrë pa u ndal”, tha Haradinaj.
Më 2 maj 1999, në Studime të Vushtrrisë, 116 civilë shqiptarë u nxorën nga kolona e qindra njerëzve që kishin marrë rrugë për Shqipëri, dhe u pushkatuan brenda dy orëve, nga forcat serbe.
