Më 27 mars të vitit 1999, nga dy aeroplanë të Serbisë janë sulmuar selitë e Agjencisë së Lajmeve KosovaPress dhe Radios Kosova e Lirë në fshatin Berishë.
Si pasojë e këtij sulmi qe vrarë Elbasan Jakup Berisha, 16-vjeçar ndërkohë që kanë marrë plagë dy prindërit e Elbasanit dhe gjashtë anëtarë të kësaj familjeje.
Sipas KosovaPress, dy aeroplanë jugosllavë të tipit MIG-21, në orën 8:20, kanë marrë në shënjestër lagjen e fshatit Berishë, ku ndodhej selia e Radios dhe e Agjencisë, dy institucionet informative të Shtabit të Përgjithshëm të UÇK-së.
Aeroplanët kanë zbrazur nga katër arka bomba të tipit kasetë, në një hapësirë prej Shtëpisë së Osman Berishës, shtëpisë së Asllan Berishës e deri te shtëpia e Mehmet Berishës në një sipërfaqe rreth 300 metra.
