Komandanti i misionit KFOR të udhëhequr nga NATO, Gjeneral Major Enrico Barduani, të mërkurën ka kryesuar ceremoninë përkujtimore që shënoi 26-vjetorin e themelimit të Forcës së Kosovës (KFOR), të mbajtur në Kampin Film City, në Prishtinë.
Sipas KFOR-it, ceremonia, në të cilën morën pjesë personel nga të 33 vendet kontribuese me trupa, filloi me vendosjen e një kurore dafine në monumentin e të Rënëve.
Barduani thuhet se ka bërë homazhe 220 anëtarëve të shërbimit që humbën jetën që nga viti 1999, duke deklaruar se ‘shembulli i tyre duhet të frymëzojë detyrat tona të përditshme në përmbushjen e misionit tonë’.
“Si misioni më jetëgjatë dhe aktualisht më i madhi në historinë e NATO-s, KFOR qëndron si një dëshmi e angazhimit të qëndrueshëm dhe të prekshëm të Aleancës, dhe përpjekjet e tij mbeten themelore në mbështetjen e progresit të nevojshëm politik drejt stabilitetit afatgjatë në rajon”, thuhet në njoftim.
