Të paktën 26 palestinezë u vranë dhe disa të tjerë u plagosën të hënën, pasi avionët luftarakë dhe artileria izraelite bombarduan disa zona në të gjithë Rripin e Gazës, përfshirë edhe ato ku strehohen familjet e zhvendosura.
Ushtria izraelite ka intensifikuar sulmet ajrore dhe granatimet me artileri në pjesët jugore dhe lindore të qytetit të Gazës, veçanërisht në lagjet Zeitoun, Shejaiya dhe al-Tuffah.
Sulme ajrore u kryen edhe ndaj katër shkollave që shërbenin si strehë për palestinezët e zhvendosur, pas paralajmërimeve për evakuim – tre prej tyre në lagjen Zeitoun dhe një në al-Tuffah, sipas burimeve lokale.
Pesë trupa u dërguan në Kompleksin Mjekësor Al-Shifa pas një sulmi me dron që goditi një grup civilësh në kampin e refugjatëve Al-Shati, në perëndim të qytetit të Gazës, njoftoi një burim mjekësor për Anadolu.
Një palestinez u vra dhe 23 të tjerë u plagosën në zonën Salah al-Din, në jug të Wadi Gaza, ndërsa kërkonin ndihmë, pas sulmit të ushtrisë izraelite, raportoi Spitali Al-Awda në Gazën qendrore.
Sipas burimeve mjekësore, forcat izraelite vranë një palestinez tjetër dhe plagosën të tjerë gjatë granatimeve që goditën tendat e tyre në zonën al-Mawasi, në perëndim të Khan Younis, ka raportuar Anadoly.
Trupat e 10 palestinezëve dhe disa të plagosur u dërguan në Spitalin Baptist Al-Ahli pas një sulmi ajror izraelit që goditi një depo tregtare në lagjen Sabra të qytetit të Gazës, ku organizatat bamirëse mbledhin dhe shpërndajnë ndihma humanitare për banorët e enklavës, tha një burim mjekësor për Anadolu.
Gjithashtu, trupi i një gruaje dhe disa të plagosur mbërritën në Spitalin Baptist pas një bombe të hedhur nga një helikopter izraelit në rrugën Al-Sikka, në lagjen Zeitoun në juglindje të qytetit, njoftoi burimi mjekësor.
“Shpërthimet nuk u ndalën kurrë; ata bombarduan shkolla dhe shtëpi. Ndihesha si tërmete”, tha për Al Jazeera Salah, 60 vjeç, baba i pesë fëmijëve, nga Qyteti i Gazës. “Në lajme, dëgjojmë se një armëpushim është afër. Në terren, shohim vdekje dhe dëgjojmë shpërthime”.
Sipas OKB-së, më shumë se 80 përqind e Gazës është tani një zonë e militarizuar nga Izraeli ose nën urdhra për zhvendosje të detyruar.
Pavarësisht thirrjeve ndërkombëtare për armëpushim, ushtria izraelite ka vrarë mbi 56,000 palestinezë në sulmet e saj në Rripin e Gazës që nga tetori i vitit 2023.
Gjithashtu, Izraeli përballet me një padi për gjenocid në Gjykatën Ndërkombëtare të Drejtësisë lidhur me luftën e zhvilluar në enklavë.
