Për nder të 25-vjetorit të rënies, fotografia e tij u vendos edhe si brosh.
Për Sali Çekajn nuk mungoi epiteti “Heroi i Kombit”.
Në nderim të tij dhe të gjithë të rënëve u mbajt edhe një minutë heshtje.
Në këtë manifestim tradicional fjalën e mori edhe mbesa e Çekajt, Leona Berisha.
Ajo buzë-dridhur rrëfeu krenarinë për të gjyshin.
“Sot, po bëhen 25 vite, një çerek shekulli që kur gjyshi im Saliu flijua për atdhe, siç mund të kuptoni sigurisht unë kam lindur shumë pas atij flijimi dhe nuk kam pasë fatin të njoh gjyshin Sali por nga familja dhe shumë prej jush kam trashëguar kujtimet për të, që kurrë nuk do të shuhen”, tha ajo.
Në këtë manifestim morën pjesë edhe bashkëluftëtarët e tij të Brigadës 138 “Agim Ramadani”.
Dy prej tyre folën për takimet e fundit me Çekajn dhe figurën e tij.
Në këtë përvjetor, anëtarët e kësaj shoqate i ndanë dy çmime për veprimtari të dalluar.
Ky çmim iu nda dy laureatëve, Joseph DioGuardi dhe Shirley Cloyes DioGuardi.
Kongresmeni amerikan DioGuardi që është me prejardhje shqiptare falënderimet i bëri online duke kujtuar kohën në Kosovë.
“Më kujtohet, kur hyra në hotel, nga dhoma në katin e dytë e hapa dritaren dhe thashë, në emër të Fan Nolit: ‘Oj Kosovë, mos ke frikë, se ke djemtë në Amerikë’”, tha ai.
“Në vitin 1989, Xho bëri rrugëtimin e parë, që ishte sekret, për në Beograd dhe Prishtinë për të konfrontuar Sllobodan Millosheviqin dhe për të dëshmuar personalisht okupimin brutal serb.
Në këtë manifestim, u interpretuan edhe këngë nga Grupi Trio “Forte” në nder të heroit Sali Çekaj.