25 raste të reja me fruth janë regjistruar në Kosovë vetëm gjatë javës së fundit, ka njoftuar Instituti Kombëtar i Shëndetësisë Publike të Kosovës (IKShPK).
Sipas përditësimit të fundit të IKShPK-së, nga 16 prilli deri më 17 gusht 2026, në Kosovë janë raportuar gjithsej 137 raste të konfirmuara me fruth.
Numri më i madh i rasteve është regjistruar në Prishtinë, me 47 raste, pasuar nga Fushë-Kosova me 34, Ferizaj me 12, Obiliqi me 8, si dhe Kaçaniku dhe Lipjani me nga 7 raste.
Ndërkaq, Skenderaj, Vushtrria dhe Drenasi kanë nga 3 raste, ndërsa Gjilani, Shtimja, Shtërpca dhe Deçani nga 2 raste.
Me nga një rast janë komunat Gjakovë, Graçanicë, Mitrovicë, Podujevë dhe Viti.
Në komunat ku është regjistruar numri më i lartë i rasteve, ekipet e vaksinimit kanë intensifikuar aktivitetet gjatë javës së fundit.
“Në Prishtinë, Fushë Kosovë, Ferizaj, Obiliq, Vushtrri dhe Skenderaj, gjithsej 276 fëmijë të vonuar për vaksinim janë vaksinuar me vaksinën MMR, sipas kalendarit të rregullt të imunizimit”, bëhet e ditur në njoftim.
IKShPK u ka bërë thirrje qytetarëve që, në rast të shfaqjes së simptomave të dyshimta për fruth, si temperaturë e lartë, skuqje ose ndryshime në lëkurë, kollë, rrufë apo konjuktivit, të paraqiten menjëherë në institucionin më të afërt shëndetësor.
Instituti ka theksuar se, për shkak të infektueshmërisë së lartë të fruthit dhe rrezikut të përhapjes në komunitet, prindërit dhe kujdestarët duhet të verifikojnë statusin e vaksinimit të fëmijëve dhe të sigurojnë vaksinimin e tyre sipas kalendarit të rregullt në qendrat e mjekësisë familjare.
“Vaksinimi mbetet mënyra më e sigurt dhe më efektive për parandalimin e fruthit, uljen e përhapjes së sëmundjes në komunitet dhe mbrojtjen e shëndetit publik”, theksohet në fund të njoftimit./teve1.info./
