Njohësit e çështjeve të sigurisë, kanë komentuar mundësinë e përsëritjes së ngjarjeve të 24 shtatorit. Një veprim i tillë sipas njohësve të fushës së sigurisë nënkupton se strategjia që kanë bërë sulmuesit, pa u vërejtur nënkupton rrezikun për përsëritje të aktiviteteve të tilla në të ardhmen.
Sulmi terrorist i 24 shtatorit në veri, mbi policinë e Kosovës, la të vdekur rreshterin Afrim Bunjaku.
Por mundësinë për përsëritjen e një skenari të tillë, njohësit e fushës nuk e përjashtojnë, qofshin ato nga grupe të unifromuara apo edhe civilë.
Njohësi i çështjeve të sigurisë, Bedri Elezi vlerëson se megjithëse situata nga jashtë duket e qetë, ekziston rreziku serioz që në veri të ketë prapë aktivitete të tilla.
“Në të kaluarën këta anëtarë të organizatave terroriste kanë arritur ti shmangen kontrolleve të Policisë së Kosovës dhe t’i monitorojnë lëvizjet e pjesëtarëve të KFOR-it dhe për t’iu shmangur kontrolleve kanë përdorur ID kartat e KFOR-it, emblema në veturat e tyre, me çka është konfirmu edhe pas kapjes së tyre. Ky fakt është shumë shqetësues sepse në këtë rast NATO, përkatësisht inteligjenca e saj ka dështuar të marrë informacione në kohë reale”, ka thënë njohësi i çështjeve të sigurisë, Bedri Elezi.
Në anën tjetër, edhe profesori i shkencave të sigurisë, Drizan Shala nuk e përjashton mundësinë që skenarë të tillë të përsëriten.
Materiali i armëve të konfiskuara në vlerë prej 5 milionë eurosh, fillimisht do të përdoren si prova për procedurat gjyqësore që po mbahen ndaj të akuzuarve për sulmin e para dy javëve.
