Komisioni Qendror i Zgjedhjeve (KQZ), e ka miratuar fondin për financimin e subjekteve politike për vitin 2024 në vlerë prej 4 milionë e 800 mijë euro, raporton teve1.info
Vendimi u miratuar në mbledhjen e së premtes të Komisionit Qendror të Zgjedhjeve, derisa shuma e mjeteve për parti është ndarë bazuar në numrin e ulëseve në Kuvendin e Kosovës.
Sipas tabelës së KQZ-së, Lëvizjes Vetëvendosje i kanë takuar 2 milionë e rreth 300 mijë euro nga gjithsej 4.8 milionë.
Partisë Demokratike të Kosovës i kanë takuar 760 mijë euro për 17 ulëse në Kuvend, pasuar nga Lidhja Demokratike e Kosovës me 640 mijë euro për 16 ulëse në Kuvend duke vazhduar me partitë më të vogla.
“KQZ mori vendim për caktimin e lartësisë së mjeteve nga fondi për mbështetjen e subjekteve politike për periudhën 1 janar – 31 dhjetor 2024. Shuma e mjeteve për financimin e subjekteve politike dhe për mbështetjen e punës së secilit deputet nga ky fond është në vlerën e përgjithshme: 4,800,000.00€”, thuhet në njoftimin e KQZ-së.
