Qeveria e Kosovës ka vendosur për pagesën e rrezikshmërisë së pjesëtarëve të Policisë së Kosovës, duke filluar nga paga e muajit nëntor, raporton teve1.info
Kryeministri Albin Kurti, e bëri të ditur këtë në mbledhjen e Qeverisë, ku tha se muajt e deritanishëm të shtesave të rrezikshmërisë, prej kur ka hyrë në fuuqi ligji i ri i pagave, shtesat do të ndahen në mënyrë retroaktive.
“Shtesat për njësitë elitare, njësia speciale intervenuese, njësia për ndërhyrje të shpejtë dhe mbrojtje të afërt nga 150 euro shtesë pagës bazë. 120 për njësitë speciale operative K9 dhe njësia për eksplozivët dhe deminimi. Patrullave kufitare nga 100 euro ndërsa pjesëtarët e hetuesisë nga 75 euro shtesë. Ekipet reaguese dhe patrullat nga 60 euro shtesë në muaj kurse policët për sigurimin e objekteve dhe ata në menaxhim të operacioneve nga 50 respektivisht 45 euro shtesë të rrezikshmërisë”, tha Kurti.
Kryeministri Kurti tha se kjo gjendje e merr parasysh situatën e tensionuar në veri dhe do të vazhdoj për aq kohë sa të jetë e nevojshme.
“Në të kaluarën jo gjithmonë reflektonin nevojën reale dhe rëndom kishin shkaktuar pabarazi në mesin e policëve ndërsa ky kategorizim është bërë në mënyrë të kujdesshme që të mos shtresëzohen dallimet dhe mos të përsëriten defektet e mëhershme. Pagat hyjnë në fuqi me pagën e muajit nëntor ndërsa për muajt e deritanishëm nga hyrja në fuqi e ligjit të ri për pagat, shtesat e rrezikshmërisë do të ndahen në mënyrë retoriaktive”, deklaroi ndër të tjera kryeministri.
