Zëvendëskryeministri i parë i Kosovës, Besnik Bislimi, tha se rregullorja e re e Bankës Qendrore të Kosovës e cila, ndër të tjera parasheh ndalimin e përdorimi9t të dinarit serb do të hyj në fuqi nesër (e enjte), raporton teve1.info
Bislimi këtë e bëri të ditur gjatë një konference për medie, derisa tha se kjo rregullore ndalon edhe përdorimin e kartëmonedhës 500 euroshe dhe disa ndryshime tjera.
Ai shtoi se tentativat e trajtimit të kësaj rregulloreje vetëm në aspektin ndalimit të dinarit janë politike dhe dashakeqe.
“Objekt i rregullores nuk ka qenë dhe as nuk është caktimi i monedhës zyrtare në qarkullim meqë kjo është e caktuar shumë më herët. Njësoj nuk ka qenë fokus i kësaj rregulloreje ndalimi i qarkullimit të ndonjë monedhe sepse edhe kjo ka qenë dhe vazhdon të jetë e rregulluar në Kushtetutën tonë si akti më i lartë juridik. Andaj çfarëdo tentative që rregullorja të trajtohet nga, ose vetëm nga aspekti i ndalimit të përdorimit të një monedhe të caktuar, në rastin më të mirë përbënë mosnjohje të rregullores apo kompetencave të BQK-së, por edhe tendencë për keqpërdorim të caktuar për interesa jofisnike e politike. Në nxjerrjen e kësaj rregulloreje BQK është kujdesur në maksimum për ruajtjen e pavarësisë së saj të plotë si institucionale ashtu edhe menaxheriale. Të gjitha këto hyjnë në fuqi nesër. Tentativat e hyrjes në fuqi të interpretohet vetëm nga këndi i ndikimit që do të ketë në transportimin e valutave në dinarë e shpërfill rregulloren në tërësi dhe devalvon të gjitha këto aspekte të rëndësishme që rregullojnë operacionet me para të gatshme në vend”, u shpreh Bislimi.
Bislimi bëri të ditur se një vendim i tillë është diskutuar edhe një ditë më parë me emisarin e BE-së për Dialogun Kosovë-Serbi, Miroslav Lajçak.
“Asnjë nga kërkesat e palëve të involvuara e sidomos për miqtë tanë ndërkombëtarë nuk e vë në dyshim ligjshmërinë e rregullores së BQK-së. Nuk e vë në dyshim as faktin që BQK është institucioni i vetëm që dizajnon dhe zbaton politikën monetare në vend. Nuk e vë nën dyshim që me gjithë këtë proces BQK është institucion i pavarur dhe që në këtë dizajnim të politikave monetare BQK i nënshtrohet vetëm Kushtetutës tonë dhe standardeve më të avancuara ndërkombëtare. E vetmja brengë e partnerëve tanë ka të bëjë me domosdoshmërinë që për përshtatjen eventuale të operimit nën ombrellën e re të operimeve ata qytetarë që kanë pranuar transfere nga Serbia të kenë pak më shumë kohë në dispozicion dhe të jenë të informuar më mirë. Nga kjo sa u tha më lartë bëhet e qartë se siguresa parësore është sigurimi i një tranzicioni të lehtësuar dhe siguria te qytetarët serb”, tha Bislimi.