Sot është bërë përurimi i Parkut Industrial në fshatin Budrikë të Vitisë. Kryeministri Albin Kurti tha se kjo do i kontribuojë rritjes ekonomike të vendit, e ministrja e Industrisë, Rozeta Hajdari tha se po fuqizojnë prodhimet vendore. Teksa kryetari i Komunës kërkoi më shumë investime të tilla në atë pjesë të vendit.
Fillimisht po sigurohen që të bëhen të gjitha përgatitjet para nisjes së ceremonisë.
E më pas, përfaqësuesit e nivelit lokal dolën në pritje të atyre të nivelit qendror.
Me të arritur kryeministri Albin Kurti e ministrja e Industrisë e Ndërmarrësisë, Rozeta Hajdari filloi ceremonia e inaugurimit të parkut të Biznesit në Budrikë të Vitisë.
Gjatë fjalës së tij, Kurti vlerësoi se ky park do të ketë kontribut të rëndësishëm për rritjen e zhvillimit ekonomik dhe rajonal.
“Do të mbështesë investimet e përgjegjshme dhe të qëndrueshme të bizneseve tona, nga diaspora dhe investime të huaja; mandej do të nxisë veprimtari prodhuese dhe përpunuese me teknologji të përparuar; do të ofrojë punësim dhe aftësim për të rinjtë tanë si shtyllë e zhvillimit dhe transformimit progresist të vendin tonë; si dhe do të rrisë bashkëpunimin ndërmjet bizneseve dhe promovimin e tyre, për një ekosistem inovativ me rritje të konkurrueshmërisë, për më shumë eksporte e më pak deficit tregtar”, ka thënë Kurti.
E ministrja Hajdari, thekson se me investime si kjo, po ngrisin vlerën e prodhimeve vendore karshi atyre ndërkombëtare.
Kurse, kryetari i Komunës, Sokol Haliti, po kërkon më shumë investime të tilla nga niveli qendror, për shkak siç thotë edhe pozitës së mirë të kësaj komune.
Pas përfundimit të fjalimeve, u bë edhe prerja e shiritave në hyrje të këtij Parku Biznesor.
Më pas, krerët institucional vazhduan vizitën brenda hapësirave të kësaj zone ekonomike, e ku u shërbyen me një koktej rasti.
Ky investim i realizuar nga MINT kap vlerën e 1.7 milionë eurove, në një hapësirë prej 15 hektarë e gjysmë e ku pritet të vendosen rreth 30 biznese.
