Spitali i Përgjithshëm në Pejë e ka mohuar se është kthyer në punë drejtori mjekësor, i shkarkuar për incidentin e futjes së fetusit në lavatriçe, Muhamet Haliti, raporton teve1.info
Përmes një njoftimi në Facebook nga Spitali i Pejës, thuhet se ndaj doktor Halitit është duke u zhvilluar një proces gjyqësor derisa në pozitën menaxheriale të këtij spitali mbetet drejtori i zgjedhur pas shkarkimit të Halitit.
“Institucioni ynë ndjen për obligim të informon opinionin publik se pretendimet e paraqitura nga Dr.Muhamet Haliti për kinse kthimin e tij në pozitën e Drejtorit Mjekësor pozitë nga e cila është shkarkuar nuk qëndrojnë dhe janë të pa vërteta.
Tentimet për njollosjen e organeve udhëheqëse janë të ulëta dhe shpërfaqin frustrimin personal të personit në fjalë.
Për hir të korrektësisë njoftojmë opinionin publik se është duke u zhvilluar një proces gjyqësor në gjykatën e apelit lidhur me validitetin e shkarkimit të tij nga pozita menaxheriale Drejtor Mjekësorë, pozitë që e ka ushtruar mbi 17 vite, sigurisht me përkrahjen e ish pushtetarëve”, thuhet ndër të tjera në reagimin e Spitalit të Pejës.
Ky reagim ka ardhur pasi një ditë më parë, vet ish drejtori mjekësor, Muhamet Haliti, përmes një statusi në Facebook, kishte shkruar se Gjykata themelore në Pejë e ka shpallur të kundërligjshëm vendimin e drejtorit ekzekutiv të këtij spitali, Fazli Shala, për shkarkimin e tij.
“Ju njoftoj se Gjykata Themelore e Pejës e ka shpallur të kundërligjshëm vendimin e drejtorit ekzekutiv të Spitalit të Përgjithshëm të Pejës, dr. Fazli Shala, me të cilin më kishte shkarkuar padrejtësisht nga pozita e Drejtorit Mjekësor të këtij institucioni shëndetësor, duke tentuar të më bëj padrejtësisht përgjegjës në rastin e futjes së foshnjës (fetusit) në rrobalarëse, në dhjetor të vitit të kaluar.
Drejtësia i ka dhënë fund këtij pretendimi qëllimkeq të z. Shala duke e detyruar të më kthej në pozitën e mëhershme si Drejtor Mjekësor i Spitalit të Përgjithshëm të Pejës.
Arsye e këtij skenari të turpshëm të dr. Shales ishte mbrojtja e personave përgjegjës të lidhur me rastin, e që është vet ai si drejtues i spitalit, në aspektin moral, pastaj drejtorit të administratës, që është mik i tij. Mik i politikës. Mik i partisë në pushtet, i Vetëvendosjes, që i solli ata në këto pozita menaxhuese. E qëllimi ishte i qartë, eliminimi i njerëzve me urdhër partiak që kanë bindje tjera politike”, kishte shkruar ish drejtori mjekësor, Muhamet Haliti.
Në Spitalin e Pejës kishte ndodhur një incident muaj më parë, kur fetusi i larguar nga një grua shtatzënë, ishte futur gabimisht në rrobalarësen e spitalit.
Për këtë incident të spitalit kishte shumë reagime derisa stafi menaxherial ku kishte ndodhur ngjarja, ishte shkarkuar nga pozita.