Stinori i ngrohjes këtë vit pritet të fillojë më 15 tetor, mbi 40 mijë banorë në kryeqytet do të furnizohen me ngrohje nga Termokos. Ndërkaq shtrirja e rrjetit sivjet do të bëhet edhe në disa lokacione të reja.
Gjatë së martës është nënshkruar marrëveshja mes Korporatës Energjetike të Kosovës dhe Termokosit për furnizim me ngrohje për stinorin dimëror 2023/24.
Me arritjen e kësaj marrëveshje hapet rruga që ngrohja të nisë më 15 tetor.
Kjo parasheh që mbi 40 mijë banorë në Prishtinë do të furnizohen me ngrohje sivjet nga Termokos.
“Vitin e kaluar si dhe një pjesë në pjesën e parë të vitit 2023 ka përfunduar kyçja në rrjetin e ngrohjes 141 objekte janë në lagjen Mati I, ndërsa gjatë kësaj vere keni pa punimet në terren përkatësisht në lagjen qendër mbrapa Siriusit kanë qenë 63 objekte banesore që janë kyçur për herë të parë në rrjetin e ngrohjes, kemi 34 objekte të lagjes Arbëria”, ka thënë zëdhënësja e Termokos-it, Afërdita Uka.
Tutje një ndër projektet e tjera që po zhvillon Termokosi është edhe një projekt solar.
“Ky është një projekt kapital i ndërmarrjes në saje të tij do të furnizohen edhe 12 mijë konsumatorë tjerë të rinj, një pjesë e epërme të lagjes Arbëria me ndërtime kolektive dhe një pjesë në Tophane di të kenë mundësi të furnizohen me ngrohje ndryshe nga sistemi që e kemi tash, pra duke e shfrytëzuar energjinë e pastër diellore do të mundësohet fale paneleve solare që do të shtrihen në një pjesë në Shkabaj, është një hapësirë prej 25 hektarësh”, është shprehur Uka.
Projekti për energji diellore nga njohës të çështjeve të mjedisit po konsiderohet i qëlluar dhe me benefite.
“Shihet të shfrytëzohet gjatë dimrit në rezervarë të izoluar, uji i nxehtë që ruhet do ta përdorë termokosi për rritjen e rrjetit për 12 mijë familje, kjo do të ndikojë mirë në cilësinë e ajrit dhe ndotjes në kryeqytet”, tha ambientalisti Sami Makolli.
Sezoni i ngrohjes nga Termokosi do të vazhdojë deri më 15 prill.
