Në shkollën “Pandeli Sotiri”, ku ndjekin mësimin nxënësit e fshatit Plemetin, tregojnë se si po organizohet mësimi pasi që një numër i nxënësve janë pa libra.
Çantat i vendosen në krah e u bënë gati të shkojnë në shkollë.
Por, brenda tyre kanë vetëm fletore.
Kjo pasi këta nxënës të komunitetit rom ende nuk i kanë blerë librat, megjithëse viti i ri shkollor ka filluar me 1 shtator.
Për shkak të problemeve teknike gjatë aplikimit në e-Kosova, Habib Gashi nga fshati Plemetin në Obiliq thotë se ende nuk ka aplikuar për subvencionim të librave.
Madje, Gashi i cili është prind i shtatë fëmijëve, tre prej të cilëve janë në shkollën fillore thotë se nuk ka mundësi financiare që personalisht t’i blejë librat.
E për të përfituar nga subvencionet ka aplikuar edhe Hanimsha Ibrahimi, nëna e nëntë fëmijëve, njërin prej të cilëve e ka në klasën e pestë.
Mirëpo, as Ibrahimi ende nuk i ka siguruar librat për djalin e saj 10 vjeçar.
Mos blerja e librave i ka shkaktuar vështirësi në mbajtjen e procesit mësimor.
Mësimdhënësi, Ardian Stullqaku ka treguar formën e mbajtjes së mësimit në shkollën “Pandeli Sotiri” në Plemetin.
Stullqaku tregon edhe problemi që patën gjatë furnizimit me libra të nxënësve të ciklit të lartë.
MASHTI këtë vit shkollor do të subvencionojë tekstet e reja për nxënësit e klasave 1-5, ndërsa për nxënësit e klasave 6-9 do të jenë në dispozicion tekstet e vitit paraprak.
