Kryesia e Kuvendit ka vendosur për seancë plenare të enjten, më 6 prill, raporton teve1.info
Sipas shefit të deputetëve të Aleancës për Ardhmërinë e Kosovës, Besnik Tahiri, të enjten është thirr kryeministri i Kosovës, Albin Kurti në interpelancë për 2 vjet qeverisje.
Tahiri tha se me kërkesë të kësaj partie, në këtë seancë ndër të tjerash do të diskutohet edhe për dyvjetorin e Qeverisë Kurti.
Këto dy vjet, Tahiri i quajti të rënda për ekonominë dhe për politikën e jashtme dhe të brendshme.
“Është dakorduar që të ketë një seancë të rregull të enjten ku do të jetë diskutimi me kërkesë të AAK-së për dy vitet e Qeverisë Kurti. Lidhet me gjendjen e rëndë në rrafshin e brendshëm dhe atë diplomatik. Sot të gjitha çmimet janë rritur dhe çfarë nuk është rritur është paga. Është rritur fatura e energjisë. Ekonomia është para kolapsit. Nëse flisni që ata që janë pronar të biznese, ankohen për mungesë të ndihmës dhe kushteve”, tha Tahiri.
Tahiri ka folur edhe për pagën minimale.
“Paga minimale është 170 euro, na patën lodh me këtë pagë minimale. Asnjë fjalë për reformën sociale dhe për pensionistët. Andaj ne të enjten do t’i adresojmë këto çështje”, tha tutje ai./EO/
