Gjykata Themelore në Pejë e ka dënuar me 22 vjet burgim A.N., i cili u shpall fajtor për vrasjen e M.A. në prill të vitit 2022, për vrasje të rëndë në tentativë dhe për armëmbajtje të paautorizuar.
Gjykata Themelore në Pejë e ka dënuar me 22 vjet burgim A.N., pasi e ka shpallur fajtor për tri vepra penale, përfshirë vrasjen e fqinjit të tij, M.A., në prill të vitit 2022.
Aktgjykimi është shpallur nga Departamenti i Krimeve të Rënda, me trupin gjykues të kryesuar nga gjyqtari Musë Povataj, me anëtarët Veton Ademaj dhe Shaqë Curri.
Sipas vendimit të gjykatës, për veprën penale të vrasjes, A.N. është dënuar me 19 vjet burgim. Për veprën penale të vrasjes së rëndë në tentativë, atij i janë shqiptuar pesë vjet burgim, ndërsa për mbajtjen, kontrollin ose posedimin e paautorizuar të armëve është dënuar me një vit burgim.
Pas shqiptimit të dënimeve për secilën prej tri veprave penale, gjykata ka caktuar dënimin unik prej 22 vjetësh burgim.
Gjykata ka urdhëruar gjithashtu konfiskimin e armëve dhe municionit të sekuestruar në këtë rast. Po ashtu, ka vendosur që A.N. të vazhdojë të mbahet në paraburgim deri në marrjen e formës së prerë të aktgjykimit, por jo më gjatë se dënimi unik i shqiptuar.
Rasti lidhet me vrasjen e M.A., i cili u vra në prill të vitit 2022 nga fqinji i tij, A.N.
Sipas informacioneve të raportuara për rastin, ngjarjes së rëndë i kishte paraprirë një konflikt mes disa familjarëve të viktimës dhe të pandehurit, i cili më pas kishte eskaluar në përleshje fizike.
Në kohën kur ndodhi vrasja, një familjar i të pandehurit ishte duke u intervistuar nga Policia e Kosovës në cilësinë e viktimës, lidhur me rastin e rrahjes.
Me aktgjykimin e shpallur, Gjykata Themelore në Pejë ka caktuar dënimin unik prej 22 vjetësh burgim për A.N., ndërsa vendimi ende duhet të marrë formë të prerë.
