Deputeti i LDK-së, Avdullah Hoti, tha se mungesa e kuorumit në Kuvendin e Kosovës është joserioze, raporton teve1.info
Përmes një reagimi publik, Hoti ka shkruar se u anulua seanca me pika të rendit të ditës të cilat sipas tij po presim tash e disa muaj për miratim.
Po ashtu, Hoti këtë shtyrje të seancave dhe mosmiratim të pikave të rendit të ditës e quajti tendencë të pushtetit për t’i kapur institucionet publike në Kosovë.
“Sot u anulua seanca e Kuvendit të Kosovës në mungesë të kuorumit. Kjo sjellje e mazhorancës është joserioze. Ka pika në rendin e ditës që presin për muaj me radhë, përfshirë zgjedhjen e udhëheqësve dhe bordeve të institucioneve të pavarura.
Shumë institucione të pavarura dhe agjenci qeveritare kanë mbetur pa drejtues për shkak të insistimit të Kryeministrit për të futur duart gjithkund në shërbimin publik”, tha Hoti.
Ai si tendencë për kontroll të institucioneve të pavarura e përmendi rrëzimin e Ligjit për Këshillin Prokurorial të Kosovës nga ana e Gjykatës Kushtetuese, derisa tha se njëjtë do të ndodh edhe me atë për zyrtarët publik dhe Ligjin për kufizimin e çmimeve.
