Dogana e Kosovës ka zbuluar një parregullsi gjatë importimit të mallrave në pikën doganore në Vërmicë, ku është identifikuar një rast i deklarimit të pasaktë të kodit tarifor, me qëllim të shmangies së detyrimeve doganore dhe procedurave të licencimit.
Sipas njoftimit zyrtar, rasti është zbuluar gjatë kontrollit të dokumentacionit dhe verifikimit të deklaratës doganore, ku zyrtarët kanë konstatuar se malli ishte paraqitur me një kod tarifor që nuk kërkonte licencë importi.
Përmes këtij klasifikimi, për mallin ishte deklaruar detyrim importi prej vetëm 8 për qind.
Mirëpo, pas verifikimeve të kryera nga zyrtarët doganorë, është përcaktuar se malli duhej të klasifikohej në një kategori tjetër tarifore, e cila kërkon licencë nga organet kompetente mbikëqyrëse.
“Me klasifikimin e saktë, malli i nënshtrohet taksës doganore prej 10 për qind dhe TVSH-së prej 18 për qind”, thuhet në njoftim.
Vlera e përgjithshme e mallit, pa përfshirë detyrimet e importit, është rreth 21 mijë euro.
Dogana ka vlerësuar se rasti përbën kundërvajtje doganore, pasi përmes deklarimit të gabuar është tentuar të shmangen detyrimet financiare dhe kërkesat ligjore për import.
Në njoftim theksohet se respektimi i procedurave të licencimit dhe kontrollit nga institucionet kompetente është i rëndësishëm edhe për mbrojtjen e shëndetit publik, pasi importimi i produkteve pa autorizimet e nevojshme mund të paraqesë rrezik për qytetarët.
“Dogana e Kosovës vazhdon të intensifikojë kontrollet dhe verifikimet e deklarimeve doganore, me qëllim të parandalimit të parregullsive, mbrojtjes së interesave financiare të shtetit, sigurisë së qytetarëve dhe garantimit të konkurrencës së drejtë në treg”, thuhet në njoftim./teve1.info/
