Zëvendësministri i Ekonomisë, Getoar Mjeku ka thënë se Fondi Sovran është një mekanizëm që nuk e prek tregun e lirë dhe se i ndihmon posaçërisht sektorit privat.
Ai në emisionin “Ditari” në Tëvë 1 ka thënë se ka dy krahë të funksionimit të këtij fondi.
“Në njërën anë është menaxhimi i aseteve apo administrimi i ndërmarrjeve që do të jenë kryesisht ndërmarrjet e mëdha publike që ne ia bartim Fondit si Trepça, Telekomi, KEK, etj apo edhe ndërmarrje të tjera. Do të jetë edhe krahu i investimeve, ato brenda dhe jashtë vendit. Fondi do të ketë dy dyer të ndërlidhjes me sektorin privat. Në njërën anë do të jetë mundësia e futjes së kapitalit privat në ndërmarrjet që janë nën pronësi shumicë të Fondit Sovran dhe në anën tjetër është mundësia që fondi të investojë në kompani private, kryesisht brenda vendit tek sektorët me potencial, prodhimi dhe eksporti, por do t’i prioritizojmë sipërmarrjet kampione që e dëshmojnë veten”, ka deklaruar Mjeku.
Mjeku ka shtuar se Fondi Sovran do t’i përgjigjet Kuvendit, do të mbikëqyret nga i gjithë spektri politik por do t’i ndjek politikat zhvillimore të Qeverisë.
“Në Fondin Sovran do të ketë kapital shtesë. Do të ketë mjete likuide që mund të investohen në ndërmarrje sipas nevojës por do të ketë edhe kapital njerëzor, mekanizma të veçantë për nxjerrjen e talentëve. Fondi Sovran do të jetë ndërmarrje e pavarur që i përgjigjet Kuvendit me një Bord mbikëqyrës që e zgjedh Kuvendi përmes një komisioni profesional. Te mbikeqyrja do të kenë rol i gjithë spektri politik por strategjia e Fondit do të hartohet në mënyrë ta pavarur, duke i ndjek vetëm ato politikat zhvillimore të Qeverisë por duke mos u varur prej politikës ditore”, ka shtuar ai.
Qeveria e Kosovës të dielën ka lansuar Fondin Sovran. Kryeministri Albin Kurti është shprehur se me krijimin e Fondit Sovran do të ketë stabilizim të ekonomisë së Kosovës.
https://teve1.info/lajmet/zv-ministri-i-ekonomise-tregon-shembujt-qe-mori-kosova-per-krijimin-e-fondit-sovran/
