Sipas aktgjykimit, i akuzuari Xhakli për veprën penale “falsifikimi i dokumentit zyrtar” u dënua me dënim me 6 muaj burgim, i cili dënim me pëlqimin e të akuzuarit iu zëvendësua me gjobë prej 2 mijë euro.
I akuzuari po ashtu është obliguar t’i paguajë edhe shpenzimet procedurale në shumë prej 30 euro dhe 50 euro për kompensimin e viktimave të krimit.
Sipas aktakuzës së ngritur në nëntor të 2021-ës, i akuzuari Besim Xhakli ngarkohej se më 15 gusht 2018, me dashje, duke shfrytëzuar detyrën e tij zyrtare si zyrtar i gjendjes civile në Komunën e Ferizajt, në sistemin elektronik të gjendjes civile, kishte shënuar të dhëna të rreme, gjoja se personi me emër A.I., kishte qenë i regjistruar në librin amëz të të lindurve në numër të faqes 358, me numër rëndor 1531 edhe pse e ka ditur se kjo nuk është e vërtetë.
Me këtë, ngarkohej se ka kryer veprën penale “Falsifikimi i dokumentit zyrtar” nga neni 434, par 1 të Kodit Penal, ku kryesi dënohet me burgim prej 6 muaj deri në 5 vjet. /BetimipërDrejtësi
