Njëra nga klubet e Kosovës, “2 Korriku” që ka nxjerrë një numër të madh talentesh që kanë bërë karrierë nëpër klubet kosovare, por edhe nëpër ato evropiane, është duke kaluar nëpër një periudhë të vështirë financiare.
“2 Korriku”, që funksionon si shkollë futbolli por edhe si klub që garon në Ligën e Parë, qëllim kryesor ka zbulimin dhe përgatitjen e futbollistëve të rinj.
Drejtori sportiv i klubit, Drilon Baholli për KosovaPress deklaron se interesimi për të qenë pjesë e kësaj shkolle është jashtëzakonisht i madh. Por, angazhimin e tyre Baholli shprehet se po e vështirëson situata tejet e rëndë financiare, në të cilën janë futur.
Ai bën të ditur se tash e një vit, klubi nuk ka marr asnjë të hyrë financiare dhe kjo për shkak të procedurave që duhet të kryhen brenda Ministrisë së Sportit për të përfituar nga Ligji i Sponsorizimit.
Interesimi i sponsorëve për t’u ofruar me klubin nuk mungon, por, sipas Bahollit është shteti që nuk po i lehtëson procedurat duke bërë që klubi të futet në njërën nga periudhat më të vështira të ekzistencës së tij.
Pikërisht nga akademia e “2 Korrikut” kanë dalë emra që kanë bërë bujë edhe në futbollin evropian, si Etrit Berisha, Ardian Ismajli e Mentor Zhdrella janë ndër emra që e bëjnë të lavdishme historinë e këtij klubi.
Një lajm i mirë në të gjithë këtë situatë nëpër të cilën po kalon klubi, është fakti që Komuna e Prishtinës ka nisur ndërtimin e tribunave të stadiumit ku “2 Korriku” i zhvillon stërvitjet dhe ndeshjet kampionale. Sa i përket ekipit të parë, Baholli thotë se në sezonin e ri, klubi do të luftojë për të siguruar inkuadrimin në Superligën e Kosovës.
