700 konsumatorë në disa fshatra të Gjakovës që nga dita e djeshme kanë mbetur pa rrymë. Kjo pasi në fshatin Nivokaz ka ndodhur një zjarrvënie dhe si pasojë e kësaj janë djegur asetet e KEDS-it
Ekip i KEDS-it të martën qëndruan në fshatin Nivokaz të Gjakovës.
Kjo pasi të hënën, kjo hapësirë është kapluar nga flakët.
E si pasojë e kësaj, 700 shtëpi të disa fshatrave përreth kanë mbetur pa energji elektrike.
E këtë hall e ka edhe Avni Quni nga fshati Molliq.
Ai erdhi për t’u njoftuar për së afërmi për gjendjen këtu.
“Janë duke u bërë 24 orë që jemi pa energji elektrike, dmth Molliqi, Botusha, Borvina,Berjav, Stublla, krejt komplet jemi 700 shtëpi që jemi pa rrymë prej ditës së djeshme. KEDS-i kanë ardh vetëm i kanë këput kabllot edhe i kanë leshu në dy fshatra edhe për neve na kanë ndal në ora 15:00 edhe nuk janë marrë”, u shpreh ai.
Ndërsa sipas KEDS-it, nga ky zjarr janë dëmtuar 300 metra kabllo nëntokësore.
““Dje, pas pranimit të informatës për dëmin e shkaktuar nga zjarri në asetet elektroenergjetike të KEDS-it në disa fshatra të Gjakovës ku, si rezultat, rreth 700 konsumatorë kanë ngelur pa furnizim me energji elektrike, ekipet e Mirëmbajtjes së KEDS-it janë mobilizuar për ta rikthyer gjendjen në normalitet. Nga ky zjarr janë dëmtuar nja 300 metra kabllo nëntokësore, disa shtylla dhe asete të tjera të KEDS-it”, tha zëdhënsi Lulzim Krasniqi.
Për këtë rast ka dhënë sqarime edhe Policia e Kosovës.
“Më datën 05.08.2024, policia është njoftuar nga ankuesi mashkull kosovar për një rast zjarrvënie në fshatin Nivokaz-Gjakovë, si pasojë e së cilit ishin djegur edhe disa kabllo të rrymës. Policia ka dalë në vendin e ngjarjes, po ashtu edhe zjarrfikësit. Në konsultim me prokurorin e shtetit është iniciuar rast penal “zjarrvënie”, thuhet nga Policia.
Televizioni ka tentuar të marrë një qëndrim edhe nga komandanti i zjarrfikësve në Gjakovë, mirëpo i njëjti tha se nuk ka ndonjë përgjigje për këtë rast.
Ndërsa ekipet kanë vazhduar të punojnë deri në sanimin e dëmeve të shkaktuar nga zjarri.
