Një vizitë e tillë nuk ishte e paralajmëruar më herët.
Nesër kancelari gjerman, Olaf Scholz, do të udhëtojë për në Beograd ku do të takohet me presidentin serb, Aleksandar Vuçiq.
Të premten pritet të nënshkruhet një marrëveshjeje bashkëpunimi midis Bashkimit Evropian dhe Serbisë për importimin e mineraleve përfshirë litiumin.
Për këtë takim Vuçiq njoftoi edhe në rrjetet sociale ku shihej në humor të mirë së bashku me kancelarin gjerman, Olaf Scholz .
Mirëpo jo të gjithë në Serbi janë të lumtur për këtë marrëveshje.
Politikani opozitar serb, Djordje Miketiq, shprehet kritik për mungesë transparence nga ana e dy liderëve.
“Mendoj se tema kryesore në këtë takim do të jetë për çështjen e litiumit dhe për lëndët e tjera të para që i interesojnë shumë Bashkimit Evropian për fabrikat e baterisë të cilat do të përdoreshin për makinat elektrike. Por, problemi qëndron se kjo vizitë nuk është aspak transparente dhe mungon një agjendë. Zakonisht kur vinë politikanë të nivelit të lartë siç është kancelari gjerman, Olaf Scholz, ne paraprakisht i dimë agjendat por jo kësaj radhe. Shumë qytetar janë kundër marrëveshjes për të hapur minierën e litiumit në Serbi dhe ka pasur protesta për këtë gjë”, tha Miketiq.
Tutje, Miketiq shprehet i zhgënjyer me qasjen e Gjermanisë e cila sipas tij nuk po shqetësohet me gjendjen e demokracisë në Serbi madje po bashkëpunon me Vuçiqin.
“Një pjesë e madhe e jona po e kemi të vështirë ta kuptojmë se si një shtet si Gjermania që është shtylla e Bashkimit Evropian është e interesuar për litiumin në Serbi dhe jo për gjendjen e demokracisë, lirinë e shtypit dhe mashtrimet zgjedhore këtu. Ato materiale i kanë në Gjermani, por refuzojnë t’i gërmojnë në territorin e tyre”, tha ai.
Miketiq i ka disa fjalë edhe për presidentin e Serbisë, Aleksandar Vuçiq.
“Aleksandar Vuçiq i ka gjithmonë dy anë. Për konsum të brendshëm ai flet shumë keq për evropianet dhe amerikanet kurse kur takohet me diplomatet këtyre shteteve ai shfaqet si një servil. Ai ju ke premtuar gjithçka kompanive të huaja vetëm të vazhdoj të qëndroj në pushtet”, tha ai.
Aleksandar Vuçiq ka paralajmëruar se me kancelarin gjerman pos tjerash do të bisedojë edhe për Kosovën.