Gjykimi ndaj serbit Çasllav Jolliq, i akuzuar për krime lufte në Istog gjatë viteve 1998-99, është duke shkuar drejt fundit.
Rreth një vit e gjysmë që nga fillimi i këtij procesi gjyqësor, të mërkurën palët kanë paraqitur fjalët e tyre përfundimtare.
Në seancë të pranishëm ishin të dëmtuarit Zef Malsia dhe Nexhmedin Curri, të cilët pretendojnë së gjatë periudhës së luftës, i akuzuari Jolliq ka ushtruar dhunë fizike dhe torturë mbi ta.
Prokurori i rastit Ilir Morina në fjalën e tij ka thënë se janë dëgjuar dëshmitarë dhe janë administruar prova që faktojnë se i akuzuari ka ushtruar dhunë mbi viktimat.
Ndaj për të gjitha këto akuza, prokurori kërkoi që ndaj tij të shpallet aktgjykim dënues dhe te dënohet konform ligjit.
Të dëmtuarit, Malësia dhe Curri qëndruan pranë fjalës përfundimtare të prokurorit, teksa kërkuan edhe dëmshpërblim në rast se i akuzuari shpallet fajtor.
Ndryshe nga prokurori, avokati i Jolliq mohoi që klienti i tij e ka kryer këtë vepër penale, ndaj kërkoi që i njëjti të lirohet.
Për fund i shkurtër në fjalën e tij ishte vet i akuzuari.
“Desha t’iu them që iu falenderohem. Unë jam në dorën e juaj dhe ju vendosni. Sikurse kam thënë edhe herën e fundit askush nuk mund të më frikësoj të kthehem aty ku jam lindur dhe rritur”, tha Jolliq.
Prokuroria Speciale e Kosovës më 18 nëntor 2022 ka ngritur aktakuzë ndaj të pandehurit Çaslav Joliq me arsyetimin se prej muajit janar 1998 deri më 21 qershor 1999, në Komunën e Istogut, në bashkëkryerje me persona të tjerë, ka torturuar, rrahur dhe ka cenuar integritetin e popullatës civile.
