Në sheshin “Zahir Pajaziti” në Prishtinë, sot është hapur një zyrë e re e Postës së Kosovës, e 145-ta me radhë. Pjesë e kësaj ceremonie ishte edhe shefi i ekzekutivit, Albin Kurti i cili e shfrytëzoi këtë pikë për dërgimin e një kartoline.
Tani ka edhe një pikë të re në kryeqytet.
Posta e Kosovës hapi mëngjesin e së enjtes zyrën e re në sheshin “Zahir Pajaziti”.
E pjesë e ceremonisë ishin edhe kryeministri Albin Kurti e ministrja e Ekonomisë, Artane Rizvanolli.
Madje shefi i ekzekutivit, këtë pikë e shfrytëzoi edhe për dërgimin e një kartoline.
Kryeministri Kurti deklaroi se Posta e Kosovës po ngritët duke ofruar shërbime cilësore, të shpejta e më të lira.
“Pika e 145 në Republikën e Kosovës e njëkohësisht edhe pika më e mirë në kryeqytetin e Republikës në Prishtinë. Nëse dikush ka pasur dilema se cili është vendi më i mirë në Prishtinë, është pikërisht pika e re e Postës së Kosovës….Posta e Kosovës është duke u ngritur duke i bërë shërbimet më cilësore e më të shpejta e më të lira e duke qenë gjithherë pranë qytetarëve tanë pa dallim”, tha Kurti.
Ndërsa, ministrja Rizvanolli u shpreh se në Kosovë tashmë ka një menaxhim më të mirë dhe përkrahje më të mëdhe nga qeveria për ndërmarrjet publike.
“Posta ka qenë duke funksionuar me furgon që kanë pas deri në 1 milion km të kaluara që puna e tyre ka qenë shumë e vështirë, prandaj jam shumë e lumtur që ata kanë vozitje më të sigurt por edhe mund të kryejnë shërbime më lehtë dhe më shpejt për qytetarët… Me ndryshime që në dukje mund të duken të vogla, por janë shumë të mëdha për përmirësimin e shërbimit dhe janë shumë të mëdha edhe për punëtorët dhe motivimin e tyre dhe shoh secilën herë në secilën ngjarje ka një motivim m ë të madh të punonjësve dhe ka kushte më të mira për punëtorët”, tha Rizvanolli.
E Kryeshefja e Postës së Kosovës, Nora Raci u shpreh se kjo zyrë postare është shembulli më i mirë i një bashkëpunimi ndër institucional.
“Kjo zyrë sot ofron të gjitha shërbimet postare, po ashtu ofron edhe shërbimet financiare jo bankare për të gjithë qytetarët e Kosovës. Besojmë që është një shembull i mirë i bashkëpunimit ndër institucional, sepse për hapjen e kësaj zyre jemi shumë mirënjohës Ministrisë së Ekonomisë, por edhe ndërmarrje publike KEK që na ka mundësuar hapjen e kësaj zyre”, u shpreh ajo
Posta e Kosovës së fundmi ka hapur pikën e saj postare edhe në pjesën veriore të Kosovës.
