Presidentja e vendit, Vjosa Osmani, ka reaguar pas vrasjes së Liridona Murseli Ademaj, të mërkurën në Prishtinë.
Osmani e cilësoi këtë akt si monstruoz dhe kërkoi që përgjegjësit të marrin dënimin e merituar.
“Vrasja e Liridona Ademajt është krim monstruoz që duhet të marrë dënimin e merituar. Femicidi është dëshmi rrënqethëse që shpërfaq pabarazinë e rrënjosur thellë dhe dhunën me të cilën përballen gratë. Është një rrëfim tragjik i jetëve të shkurtuara brutalisht vetëm për shkak të gjinisë. Humbja e jetëve të grave nga duart e burrave është një njollë në ndërgjegjen tonë kolektive. Ky krim i tmerrshëm kërkon veprim të shpejtë dhe vendimtar për t`u siguruar që drejtësia të mbizotërojë dhe që autorët ta marrin dënimin, i cili pasqyron peshën e kësaj vepre makabre penale”, ka shkruar Osmani në Facebook.
Po ashtu, presidentja ka deklaruar se është nevojë urgjente të forcohet zbatimi i ligjit dhe kryerësit e krimeve të tilla, të përballen me dënimet më të ashpra të parapara me ligj.
“Në këto momente të rënda për gjithë vendin tonë, ndajmë dhimbjen me familjen e Liridonës, e në veçanti me fëmijët e saj të cilët humbën nënën e tyre të shtrenjtë në rrethanat më monstruoze të mundshme”, ka përfunduar Osmani./teve1.info/.
