Dy nga katër personat e plagosur në fshatin Lupç të Podujevës janë në gjendje të rëndë shëndetësore, ku njëri nga ta momentalisht është në rrezik për jetë, ka thënë doktori kujdes në Emergjencë, Agron Çitaku.
Ai në një deklarim për media ka thënë se dy personat e tjerë janë në gjendje të mirë dhe mund të lirohen.
“Dy janë në gjendje më të rëndë, ndërsa dy të tjerë janë në gjendje më të mirë të cilët do të lirohen. Për momentin njëri mund të themi se është në rrezik për jetë tjerët jo”, ka thënë ai.
Sipas tij dy nga të plagosurit e që janë në gjendje më të rëndë janë të moshës mbi 50- vjeç, kur dy të tjerët janë të moshës së re.
Në fshatin Lupq të Podujevës sot ka pasur të shtëna me armë zjarri, ku si pasojë kanë mbetur të plagosur katër persona.
Lajmin për teve1.info e konfirmoi zëdhënësja e policisë për rajonin e Prishtinës, Flora Ahmeti, teksa bëri të ditur se tre nga ta janë plagosur nga arma e zjarrit, ndërsa një person tjetër është therur me thikë.
“Sot rreth orës 16:00 kemi marrë informatën për të shtëna me armë zjarri në fshatin Lupç të Podujevës. Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme. Bazuar në të dhënat e deritanishme në këtë rast janë plagosur nga arma e zjarrit tre persona, ndërsa një person ka pësuar lëndime nga arma e ftohtë (thikë). Hetuesit policor në koordinim me prokurorinë, po ndërmarrin veprimet hetimore për ndriçimin e plotë të rastit” thuhet në përgjigjen e Ahmetit./teve1.info/.
