Pesëshja diplomatike nga BE dhe ShBA, ka ardhur në Kosovë me një plan për dialogun, të cilin e kanë diskutuar edhe me kryeministrin, Albin Kurti. Këtë e ka bërë të ditur, i dërguari i Bashkimit Evropian për dialogun, Mirsolav Lajçak, në një deklarim për media pas takimit të shtunën në Prishtinë.
Lajçak, ka deklaruar se sulmi terrorist i 24 shtatorit ka ndryshuar shumë gjëra dhe se dialogu nuk ka alternativë.
“Ne gjithmonë kemi plan, patëm një plan, e diskutuam planin tonë me Kurtin. Do ta diskutojmë edhe me Vuciq. Nuk do të lëshohem më shumë në detaje. Dialogu s’ka alternativë. Sulmi i Banjskës ka ndryshuar shumë gjëra. Dhe isha shumë i qartë që autorët duhet të përballen me pasojat. Dialogu duhet të vazhdojë”, ka deklaruar Lajcak.
Tutje, Lajçak tha se me Kurtin dhe zëvendëskryeministrin Bislimi, kanë diskutuar edhe për sigurinë në veri të Kosovës, ku ka theksuar se sulmi në veri ishte përshkallëzim i qartë nga ana e Serbisë
“Patëm një diskutim thelbësor me kryeministrin Kurti dhe me zëvendëskryeministrin Bislimi për avancimin e normalizimit midis Kosovës dhe Serbisë dhe përparimit në implementim të marrëveshjeve të kaluara. Kemi dëgjuar me kujdes qëndrimet e kryeministrit Kurti dhe brengat e tij sa i përket situatës së sigurisë në veri të Kosovës. Dua të them që sulmi ndaj Policisë së Kosovës nga individë të armatosur është përshkallëzim i qartë”, tha ai transmeton teve1.info
“I shprehëm ngushëllime kryeministrit dhe kemi dënuar fuqimisht sulmin e 24 shtatorit. E bëmë shumë të qartë se sulmuesit duhet të vihen para drejtësisë dhe presim bashkëpunimin e plotë të Serbisë dhe angazhim konkretë në këtë drejtim”.
Qëllimi i vizitës është që të arrihet progres konkret në zbatimin e Marrëveshjes për rrugën drejt normalizimit dhe depërshkallëzimin pas zhvillimeve të fundit.
Pas vizitës në Kosovë, pesë emisarët menjëherë do ta vizitojnë edhe shtetin e Serbisë./teve1.info/.
