“Prokuroria e shtetit janë aty për të punuar, s’mund ta ndihmoj dikë që s’punon”, deklaroi kështu, kryeministri i vendit, Albin Kurti.
Duke iu përgjigjur pyetjes së gazetarëve se a është në dijeni pse nuk janë publikuar ende hetimet e rastit Banjska, Kurti tha se ka shpërputhje të madhe ndërmjet dëshmive dhe proceseve gjyqësore, derisa shtoi që Prokuroria ka punuar shumë pak në këtë drejtim.
“Sot janë bërë tre muaj prej se është kumtuar urdhri për sulmin terrorist. Ky informacion ndodhet tashmë edhe te Prokuroria. Por, ka shpërputhje shumë të madhe midis informacioneve, fakteve, dëshmive e argumenteve dhe aktakuzave e proceseve gjyqësore në anën tjetër, e kjo për pasojë edhe të njerëzve që ndodhen prapa grilave. Ky hendek nuk mund të përmbushet nga Qeveria e Kosovës, i takon Prokurorisë së shtetit, andaj pyetja u takon atyre. Unë jam këtu për të ndihmuar, mirëpo ata janë aty për të punuar. S’mund ta ndihmoj dikë që s’punon. Mund ta ndihmojë vetëm dikë që punon”, potencoi Kurti para mediave.
Më tej, Kurti vitin 2023 e cilësoi si vit të sulmeve terroriste e kriminale paraushtarake.
“Në përgjithësi, viti i kaluar ishte vit i barrikadave paraushtarake, ndërsa ky vit ishte i sulmeve terroriste e kriminale paraushtarake”.
