Kryeministri i vendit, Albin Kurti, deklaroi se statusi aktual i marrëdhënieve mes Kosovës dhe Serbisë, nuk është normal. Andaj sipas tij, në thelb duhet të ketë vetëm njohje reciproke.
Këto deklarata Kurti i dha në mbledhjen e 50-të të Këshillit të Përgjithshëm të Lëvizjes Vetëvendosje, derisa shtoi se Kosova ka qenë dhe vazhdon të jetë e përkushtuar në marrëveshjen përfundimtare të dialogut.
“Kemi qenë dhe do të jemi të përkushtuar parimor, konstruktiv e kreativ në dialog. Dialogu në Bruksel është dialog për normalizimin e marrëdhënieve mes Kosovës dhe Serbisë. Statusi aktual i marrëdhënieve nuk është normal. E status normal është ai i fqinjësisë së mirë evropian. Pra, njohje reciproke si thelb dhe reciprociteti si princip”, deklaroi Kurti.
Madje sipas Kurtit, asnjëra nga qeveritë paraprake, nuk është përballur me vështirësi të tilla të natyrës globale.
Ndër të tjerash, Kurti rikujtoi edhe njëherë që kancelari gjerman, Olaf Scholz dhe presidenti francez, Emmanuel Macron, e kanë bërë të qartë se pa njohur pavarësinë e Kosovës, nuk do të ketë integrime evropiane as për fqinjët e saj.
“E sa më shpejtë që e kuptojnë, aq më mirë është edhe për ta”, theksoi Kurti.
Kurti përmendi edhe tri marrëveshjet e nënshkruara nga 6 vendet e Ballkanit Perëndimor në procesin e Berlinit, derisa theksoi se qytetarët e Kosovës do kenë përfitime të mira nga këto marrëveshje, raporton teve1.info.
“Ne kemi qenë pro aktiv për nismat siç është procesi i Berlinit. Në Berlin pas afër 2 vite negociata në nëntor të vitit 2022, janë nënshkruar tri marrëveshje nga 6 vendet e Ballkanit Perëndimor. Në tri marrëveshjet e nënshkruara qytetarët e Kosovës e fitojnë të drejtën për lëvizje të lirë dhe vetëm me letërnjoftime në tërë Ballkanin Perëndimor. Këta hapa janë shumë të rëndësishëm për konsilidimin në tregun rajonal, e që do të jetë me përfitim për ekonominë e vendeve të Kosovës dhe për qytetarët e saj. Kosova e ka parë gjithnjë që opsioni i vetëm është Evropa”, ka shtuar Kurti tutje.
Pa lënë anash edhe nismën e Ballkanit të Hapur, Kurti vlerësoi se Kosova nuk është pritur e barabartë në këtë nismë./teve1.info/.
