Eksperti i Politikave të Sigurisë dhe Gjeopolitikës, Ilir Kulla ka deklaruar se Maqedonia e Veriut nëse do të duket si shtet evropian duhet të ketë disa parime që sipas tij, duhet të jenë njëjtë për të gjithë.
Sipas Kullës, nuk mundet që një shtet të ekzistojë dhe t’i ndryshohet flamuri një herë në dhjetë vjet, emri, apo identiteti.
“Maqedonia sidomos këto vitet e fundit është detyruar të bëjë konsesione shumë të mëdha siç ishte çështja e emrit. Pra nëse grekët i morrën emrin, nëse Serbia e kontrollon kishën e dëshironë kishën, pra ka një përplasje të fortë mes kishës maqedonase dhe kishës serbe, kur themi kisha serbe nënkupton kisha ruse pra patriarkanën. Nëse Bullgarët thonë gjuhën dhe identitetin, e ne shqiptarët të kemi pjesën tonë të shtetit, pra kemi shtetin, problemi është çfarë i ngelet atyre. Në qoftë se do të shohim një shtet evropian duhet të jenë ca parime që duhet të jenë njëjtë për të gjithë dhe ne shqiptarët që e kemi nisur nga 91-shi kur filluam nga të drejtat minimale, sepse atëherë ishte vetëm 1 për qind e shqiptarëve në administratë dhe u fillua me betejën e madhe për Universitetin e Tetovës dhe kemi ardhur deri në pikën që kemi kryeministrin duhet që në të njëjtën kohë të ketë një balancë me anën tjetër. Pra të ketë një stop. Nuk mundët që një shtet të ekzistojë dhe t’ia ndryshosh flamurin një herë në dhjetë vjet apo emrin, apo identitetin”, tha Kulla në emisionin “Matrix” në Tëvë1.
Kulla theksoi se shqiptarët që jetojnë në Maqedoni të Veriut janë garantues për të ardhmen e shtetit maqedonas
“Në këtë pikë ne shqiptarët jo vetëm që jemi garantë për një Maqedoni dhe për të ardhmen e Maqedonisë, por do të ishte mirë të jemi komplementarë me maqedonasit që karshi kombeve të tjera të cilët kanë pretendime ndaj Maqedonisë t’u thuhet që kjo punë përfundon një herë e përgjithmonë. Sepse ky shtet i Maqedonisë është edhe shtet i shqiptarëve dhe ne nuk mund të kërcënojmë ekzistencën edhe të shqiptarëve aq më tepër me Bullgarinë kur Bullgaria e ka personale me pjesën maqedonase dhe mbajnë edhe peng në rastin konkret anëtarësimin e Shqipërisë, pra hapjen e negociatave të Shqipërisë me Bashkimin Evropian që nuk ka asnjë lloj lidhje me Bullgarinë, mbajnë peng edhe Maqedoninë “, shtoi Kulla./teve1.info./
Emisioni i plotë:
