Për 20 vjet, mobiliet i ruajti me kujdes.
Kjo pasi këto orendi, në vitin 2003, i bleu vet ish-presidenti i Kosovës, Ibrahim Rugova.
Për plot 10 vjet, qëndruan në Presidencën Rugova, në Velani të Prishtinës.
E për dy dekada, për to po kujdeset ish-udhëheqësi i stafit teknik në presidencën Rugova, Shaban Sfirca.
“Pasi kam qenë në shërbim teknik, erdhën mobiliet e reja, familja me tha, Shaban, nëse ke vend, merri këto e i ruajmë sepse do të shërbejnë herdo-kurdo për ndonjë muze të Kosovës”, shprehet Sfirca.
Në vitet e ’90-ta, presidencën e Kosovës në Velani, e vizituan personalitete të mëdha botërore.
Në këto mobilie, biseda të shumta u zhvilluan edhe në mes të Rugovës dhe diplomatëve amerikanë, Richard Holbrook e Christopher Hill.
“Më së shpeshti në presidencën e Rugovës, ka ardhur (Christopher) Hilli, e ka pas biseda të gjata më të, për qata kjo fotografi e ka zënë në këtë vend këtu, me Holbrook-in, tregon Sfirca.
Por në gjithë këto vjet, vetëm në një vend, Sfirca nuk u ul asnjëherë.
“Nuk ulna unë aty, se e kam një nostalgji, nuk me takon mua me u ul aty”, shprehet Sfirca.
Njeriu që nuk iu nda për asnjë moment ish-presidentit Rugova, thotë se nuk do i shiste këto mobilie, për asnjë cmim në botë.
“Këto nuk kanë cmim, këto vec historia do të tregojë se sa kanë vlerë”, thotë ai.
Pak metra më tutje, Sfirca ka ruajtur edhe tavolinën e bukës së ish-presidentit.
Madje edhe krevatin ku Rugova punonte gjatë gjithë kohës.
“Krevetin prapa e ka pasur në kuzhinë ku e ka pirë kafën pas ushqimit, dhe aty është krevati ku ka punuar më së shumti”, thotë ish-udhëheqës i stafit teknik në Presidencën Rugova.
Shaban Sfirca, në vitet e ’90-ta, me paratë e veta ndërtoi edhe spitalin “Nënë Tereza” në Vranjevc të Prishtinës.
Vetëm në këtë spital, plot 13 mijë fëmijë linden për tri vite ndërsa u kryen edhe qindra operime.