Analisti, Dorajet Imeri, thotë se është tepër e frikshme që deri më tani vetëm Kosova është sanksionuar nga ndërkombëtarët.
Gjatë diskutimit për përjashtimin e Kosovës nga “Defender Europe 2023” si dhe tensionimet në komunat veriore, Imeri vlerësoi se është humbje politike për Kosovën që nuk ka pasur asnjë reagim ndaj Serbisë.
“Në momentin kur në dy palët ke konfrontime ose ballafaqime të caktuara politike dhe vetëm njëra palë merr një goditje kaq të madhe, atëherë kjo është tepër e frikshme. Asnjë fjalë nuk i është thënë Serbisë, kjo është humbje politike për Kosovën. Sovraniteti para se gjithash, është simbolik. Sado që Kosova i vendos flamujt atje, sigurisht është hera e parë që po ndodhë kjo, nëse ne nuk arrijmë ta ruajmë këtë simbolikë, atëherë kjo do të thotë që Kosova nuk mund ta ruajë as simbolikën”, deklaroi Imeri në emisionin “Këndi i Debatit” në Tëvë1.
Gjithashtu, Imeri të frikshëm e sheh edhe faktin që Policia e Kosovës nuk ka bërë asnjë reagim për t’i mbrojtur gazetarët gjatë kryerjes së detyrës në veri.
Kujtojmë se në vazhdën e ndodhive në komunat në veri të vendit, mbi 15 sulme në drejtim të gazetarëve kanë ndodhur vetëm dy ditët e fundit.
“Ne kemi ardhur në një situatë ku i vetmi mekanizëm i sigurisë në atë zonë është KFOR-i, e ky është një kthim mbrapa”, shtoi tutje Imeri./teve1.info/.