Ambasadori i ShBA-së në Kosovë, Jeffrey Hovenier, pas takimit me kryeministrin Albin Kurti, tha se patën një diskutim të mirë rreth situatës në veri të vendit, por se nuk ka arritur t’ia ndërrojë mendjen kryeministrit Kurti.
Hovenier tha se në këtë takim ka theksuar edhe njëherë qëndrimin e ShBA-së, për nevojën e menjëhershme të depërshkallëzimit të situatës dhe për mënyrat se si mund të arrihet me tërheqjen e njësive speciale dhe kryetarëve nga zyrat e komunave veriore.
“Folëm veçanërisht për problemet aktuale, situatën ne veri të Kosovës. Ja përsërita edhe njëherë qëndrimin e ShBA-së, siç është shprehur edhe sekretari Blinken, për nevojën e marrjes së hapave të menjëhershëm për depërshkallëzim të situatës. Depërshkallëzimi mund të arrihet nëse kryetarët nuk punojnë nga zyrat dhe nëse njësitë speciale tërhiqen. Nuk mund të them se ja ndërrova mendjen Kurtit, por patëm një diskutim të mirë dhe është e qartë ajo që ShBA thotë se duhet të ndodhë. Folëm edhe për implementim e marrëveshjes me Serbinë dhe qe situata në veri është në dëm të saj. ShBA do ta inkurajojë Kosovën edhe më tutje për depërshkallëzim, po ashtu edhe Qeverinë e Serbisë.”, ka thënë ambasadori amerikan.
I pyetur për sanksionet e ShBA-së ndaj Kosovës, Hovenier tha se nuk do t’i quante ashtu, por do t’i quante pasoja.
“Ka pasur pasoja, s’do t’i quaja sanksione. Shpresoj të mos ketë më pasoja, megjithatë ShBA po shqyrton mundësitë për depërshkallëzim të situatës”, ka shtuar Hovenier tutje.
