Kryetari i Aleancës për Ardhmërinë e Kosovës, Ramush Haradinaj, ka nderuar përvjetorin e ndarjes nga jeta të bashkëluftëtarit Agron Haradinaj, duke e vlerësuar atë si shembull të përkushtimit ndaj lirisë dhe atdheut.
Haradinaj ka theksuar se Agroni ka ndjekur rrugën e atdhedashurisë edhe si i burgosur politik dhe si ushtar i Ushtrisë Çlirimtare të Kosovës
Ai e ka cilësuar veprën dhe jetën e Agronit si sinonim i guximit dhe përkushtimit për liri.
“Agroni një jetë të tërë ishte në shërbim të Atdheut, para lufte, në luftë e në paqe. Jeta për të nuk ishte aspak e lehtë, por Agroni qëndroi gjithmonë i palëkundur. Qysh si i ri ai ndoqi rrugën e atdhedashurisë të cilën e kishte trashëguar nga babai, Smajl Haradinaj. Ishte një nga të burgosurit politik më të ri në moshë, kurse gjatë luftës çlirimtare një nga ushtarët e parë të UÇK-së”, ka shkruar Haradinaj.
Gjatë ditës, Haradinaj ka vizituar edhe familjen Halilaj për të shprehur ngushëllimet pas ndarjes nga jeta të bashkëluftëtarit Brahim Halilaj.
Ai ka përmendur gjithashtu përvjetorin e ndarjes nga jeta të bashkëluftëtarit Beqë Mustafë Likaj nga Carrabregu, duke nderuar kujtimin e tij.
Haradinaj ka theksuar rëndësinë e përkujtimit dhe nderimit të kujtimeve të tyre për kontributin e tyre në luftën për liri të Kosovës./teve1.info/.
