Kryetari i Shoqatës “Zëri i Prindërve”, Bajram Çerkini, është shprehur i zhgënjyer dhe i pashpresë sa i përket miratimit të deklaratës për personat e zhdukur.
Të martën në Bruksel, Kosova dhe Serbia kanë miratuar Deklaratën për Personat e Zhdukur, me ç’rast Çerkini tha se më e rëndësishme do ishte që familjarët e të pagjeturve ta kuptojnë kur do të fillojë implementimi i asaj marrëveshje.
“Në deklaratë nuk është asnjë fjali që nuk e kam dëgjuar më parë. Por, është dashur të ceket se a do të fillojë grupi punues të punojë dhe a ka afate për fatin e zbardhjes së të pagjeturve. Politika po luajnë lojëra, po dakordohen pa nënshkrime e pa obligime. Kjo do të zgjasë ende më shumë në interesin e kriminelëve. Aspak nuk kam shpresë dhe jam tepër i zhgënjyer, ato gjëra po i përsërisin që sa e sa vite. Tani as nuk e kemi parë e as nuk e dimë marrëveshjen me 11 pika, të cilat për mua që nga fillimi e deri në mbarim nuk ka qenë e nevojshme të përsëriten, por është dashur të dihet se a do të implementohen dhe kur e kanë afatin”, deklaroi Çerkini në emisionin “Ditari” në Tëvë1.
Tutje, Çerkini u bëri lutje të gjithë akterëve vendorë e ndërkombëtarë të mos luajnë me nervat e familjarëve të cilët janë duke kërkuar fëmijët e tyre.
“Ne jemi njerëz, duam ta dimë të vërtetën nga populli ynë, e jo nga mediat e ndërkombëtarët”, theksoi ai./teve1.info/.