Nëntë persona nga Azia qendrore janë arrestuar në Gjermani dhe Holandë të enjten në lidhje me dyshimet se po planifikonin sulme terroriste, në linjë me ideologjinë e Shtetit Islamik, raporton agjencia AP.
Shtatë burra të arrestuar në Gjermani janë akuzuar për themelimin e një “grupi terrorist vendas” dhe për mbështetje të grupit të Shtetit Islamik, thanë prokurorët federalë gjermanë.
Të gjithë e njihnin njëri-tjetrin për një kohë të gjatë, kishin pikëpamje radikale islamike dhe hynë në Gjermani pothuajse në të njëjtën kohë, pak pas pushtimit të plotë të Ukrainës nga Rusia, vitin e kaluar.
Ka dyshime se vitin e kaluar, të njëjtit kanë formuar një grup që synonte të kryente sulme në Gjermani. Sipas prokurorëve, grupi ishte në kontakt me një degë të IS-it, “Provinca Khorasan e Shtetit Islamik”.
Anëtarët e saj kishin kontrolluar objektivat e mundshme në Gjermani dhe u përpoqën të blinin armë, por “nuk kishte asnjë plan konkret për sulm në kohën e arrestimit të sotëm”, thanë prokurorët në një deklaratë.
Ndërkohë në Holandë, autoritetet thanë se një burrë 29-vjeçar nga Azia qendrore dhe gruaja e tij 31-vjeçare, të cilët jetonin në vend që nga viti i kaluar, u arrestuan me dyshimin për veprën penale “për përgatitje të sulmit terrorist”.
Burri dyshohet gjithashtu se u anëtarësua në grupin e Shtetit Islamik.
Policia dyshon se burri “ishte urdhëruar për planifikimin e një sulmi terrorist”, tha shërbimi i prokurorisë në një deklaratë.
Prokurorët gjermanë thanë se personi i arrestuar në Holandë i përkiste grupit të formuar nga të dyshuarit e tjerë.