Më 24 shtator të vitit 2023, bandat kriminele të Serbisë hynë ilegalisht në territorin e Kosovës.
E nga ky sulm, mbeti i vrarë një polic i Republikës, Afrim Bunjaku.
Që një situatë e tillë të mos përsëritet, institucionet e Kosovës po kërkojnë një Traktat të Paqes.
Madje, ministri i mbrojtjes Ejup Maqedonci po thotë se kjo kërkesë ka qenë e kamotshme, mirëpo nuk u pranua nga pala serbe dhe negociatorët.
“Ka qenë në fakt propozimi i parë në bisedime i Kryeministrit Kurti për marrëveshjen 6 pikëshe të mos-sulmimit dhe mos-agresionit të ndërsjellë, si hap i parë para se të hynim në dialog. Ky draft nuk ishte përkrahur nga Presidenti Vuçiq dhe as nga negociatorët. Kjo marrëveshje do të ishte parakusht dhe garanci e përkushtimit të palëve pë dialog. Fatkeqësisht ky draft nuk u pranua dhe më pas procesi i dialogut u përcollë me zhvillime të rrezikshme siç ishte agresioni më Banjskë, kidnapimi i tre policëve të Kosovës nga forcat e rregullta të uniformuara të Serbisë, brenda territorit të Kosovës dhe aktet e tjera të agresionit dhe kërcënimit konvencional ushtarak nga Serbia. Ende vlerësoj që këto rreziqe mund të ishin shmangur sikur të kishim një marrëveshje mos-sulmimi nga të dyja shtetet në fazën e para-dialogut. Kjo marrëveshje nuk do të nën kuptonte asesi falje të gjenocidit dhe krimeve të luftës por do të vendoste ambient shumë më të përshtatshëm për dialog. Në mungesë të kësaj marrëveshje Serbia vendosi dhe vazhdon të mbajë dy të tretat e kapaciteteve të saj ushtarake në jug të territorit të saj dhe përgjatë kufirit me Republikën e Kosovës, si mënyrë kërcënimi për sigurinë dhe stabilitetin e Kosovës. Mirëpo, tanimë gjendemi në një momentum të ri dhe zbatimi i marrëveshjes bazë duhet të mbetet prioritet i palëve, kurse prioritet i institucioneve tona ruajtja e sovranitetit dhe rendit e ligjit të vendosur tashmë edhe në katër komunat veriore të vendit tonë”, u shpreh Maqedonici.
Një veprim të tillë e sheh të domosdoshëm deputetja nga pushteti, Arbreshë Kryeziu, edhe pse ajo personalisht nuk pret paqe prej Serbisë dhe udhëheqësve të saj.
“Kështu që unë mendoj që një veprim i tillë është i nevojshëm sepse në të kundërtën nuk mund të kesh paqe me një shtet që mendon se si të aneksoj një shtet tjetër dhe si të organizoj sulme terroriste në një shtet tjetër në kohën kur Bashkimi Evropian si ndërmjetës po synon që të normalizoj raportet dhe që të këto vende të i çoj drejt një raporti më të mirë fqinjësor ndryshe prej atij që e kemi pasur deri më tani”, ka thënë ajo.
Nga ana tjetër, deputetja nga Partia Demokratike e Kosovës, Ariana Musliu – Shoshi thotë se procesi patjetër duhet të mbyllet me një marrëveshje paqeje.
“Tani ne kemi dialogun që është si proces që është iniciuar nga OKB-ja, është një proces ku janë zotuar të gjitha palët që do të jenë pjesë, e kemi Bashkimin Evropian i cili e monitoron, i kemi Shtetet e Bashkuara të Amerikës të cilat janë të angazhuara në këtë proces, prandaj ne kemi një proces i cili është që nga viti 2011-të dhe i cili duhet të përmbyllet patjetër më një marrëveshje ku njohja e ndërsjellë duhet të jetë në qendër e mund të quhet edhe Traktat Paqe”, shprehet Musliu-Shoshi.
Televizioni ka kërkuar përgjigje edhe nga Bashkimi Evropian për këtë kërkesë të palës kosovare, mirëpo të njëjtit nuk kanë dhënë detaje.
