Policia e Stokholmit, ka bërë të ditur sot se ka autorizuar një protestë këtë fundjavë nga një burrë që ka deklaruar se dëshiron të djegë Torën dhe Biblën jashtë ambasadës izraelite në Stokholm.
Zyrtarët izraelitë i bënë thirrje qeverisë suedeze të ndalojë protestën, e cila është planifikuar të zhvillohet të shtunën jashtë misionit diplomatik.
Suedia kohët e fundit u përball me kritika të forta nga vendet myslimane për lejimin e protestuesve të djegin Kuranin në demonstrata të vogla anti-islame.
Burri që paraqiti kërkesën për protestën e së shtunës, tha se donte të digjte Torën dhe Biblën jashtë Ambasadës izraelite në përgjigje të djegies së Kuranit jashtë një xhamie në Stokholm muajin e kaluar nga një emigrant irakian.
Policia e Stokholmit miratoi protestën në një vendim të marrë nga Associated Press, duke thënë se tre persona do të merrnin pjesë në demonstratën jashtë ambasadës izraelite në orën 13:00 të shtunën.
Muajin e kaluar, një emigrant i krishterë irakian dogji një Kuran jashtë një xhamie në Stokholm gjatë festës së madhe myslimane të Kurban Bajramit, duke shkaktuar një dënim të gjerë në botën islame.
Një protestë e ngjashme nga një aktivist i ekstremit të djathtë u mbajt jashtë ambasadës së Turqisë në fillim të këtij viti, duke ndërlikuar përpjekjet e Suedisë për të bindur Turqinë që ta lejojë atë të anëtarësohet në NATO.
