Data e sotme ka mbetur në memorien e tifozëve të Milanit dhe atyre të Liverpoolit, ndonëse për njërën palë janë kujtime të bukura e për tjetrën të trishta.
Ishte viti 2005, më datën 25 maj, luhej finalja e Ligës së Kampionëve në Stamboll të Turqisë. Jo rastësisht kjo ndeshje kishte kryqëzuar rrugët e dy skuadrave të mëdha dhe sigurisht ishte një klasike evropiane.
Me të filluar ndeshja Maldini e dërgon në rrjetë krosimin e Pirlos dhe i jep epërsinë Milanit, ndërsa vazhdon të jetë e qetë pjesa e parë. Në minutën e 39’, Crespo shfrytëzon një rrëmujë në mbrojtjen e anglezëve dhe shënon për 2-0, ndërsa një minut para fundit i njëjti shënon golin e dytë personal pas një moment magjie nga ylli i asaj kohe Kaka dhe rrit avantazhin në tre gola. Tifozët e Milanit në ekstazë, ndërsa disa Reds lëshojnë stadiumin.
Pjesa e dytë fillon, me italianët që tashmë ishin gati për festë, por një top nga e majta të Rise, Gerrard në pikën e penalltisë e çon në skajin e portës së Didës dhe Liverpool jep shenja jete.
Nuk kalojnë as dy minuta të plotë dhe Smicer, jo njëri nga lojtarët më të dalluar të Liverpoolit, lëshon një goditje nga distanca, të cilën portieri brazilian e prek, por nuk arrin ta shtyejë jashtë portës dhe çmend anglezët, duke futur frikë tek kampi italian.
Pas afër 4 minutash, Gerrard pengohet në zonë nga Gattusso dhe gjyqtari spanjoll Manuel Gonzalez dha penallti. Xabi Alonso, i mbuluar nga barra emocionale, gjuan 11 metërshin të cilin e pret Dida, mirëpo mesfushori spanjoll shënon nga topi i kthyer dhe gjithçka vendoset në barazpeshë.
Ndeshja përfundon në rezultatin e barabartë, ndërsa nuk ndryshon as pas vazhdimeve. Në penallti ishin dy portierë të jashtëzakonshëm, Dida në një anë ndërsa në anën tjetër Jerzy Dudek.
Milani humbet dy të parat me Serginho dhe Pirlo, ndërsa Liverpool shënon, për të dështuar më pas Riise. Fatal ishte dështimi nga Andriy Shevchenko, e cili i dha fitoren reds, që doli të ishte një nga finalet më historike që ky kompeticion mbanë mend edhe sot.
Megjithatë, Milani e kishte arritur hakmarrjen dy vite më vonë pasi e kishte mposhtur Liverpoolin në finalen e vitit 2007 me rezultatin 2-1.
