Një anije turistike me më shumë se 1,700 persona është vendosur nën monitorim të ngushtë shëndetësor në Bordeaux pas vdekjes së një pasagjeri 90-vjeçar gjatë një shpërthimi të raportuar të gastroenteritit në bord.
Sipas raportimeve tw medieve, anija, e operuar nga Ambassador Cruise Line , kishte në bord 1,233 pasagjerë dhe 514 anëtarë të ekuipazhit.
Rreth 50 persona zhvilluan simptoma të ngjashme me norovirusin, duke bërë që autoritetet shëndetësore franceze të ndërhynin.
Zyrtarët konfirmuan se aktualisht ka 49 raste aktive të infeksioneve të lidhura me stomakun midis pasagjerëve dhe ekuipazhit – që përfaqësojnë pak më pak se 3% të të gjithë personave në anije.
Anija turistike u nis nga Ishujt Shetland dhe udhëtoi nëpër Belfast , Liverpool dhe Brest përpara se të mbërrinte në Bordeaux .
Anija ishte planifikuar të vazhdonte drejt Spanjës. Besohet se shumica e pasagjerëve janë shtetas britanikë dhe irlandezë.
Operatori tha se po trajton situatën “jashtëzakonisht seriozisht”, duke shtuar se “protokolle të përforcuara të higjienës dhe parandalimit” janë zbatuar në bord.
Autoritetet shëndetësore franceze kërkuan “një rutinë të gjendjes shëndetësore dhe të dhënave të anijes”, ndërsa mostrat e mbledhura nga pasagjerët u dërguan në spitalin universitar në Bordeaux për testim. Rezultatet pritet të marrin “një minimum prej gjashtë orësh për t’u përpunuar”.
Autoritetet sqaruan gjithashtu se sëmundja gastrointestinale nuk besohet të jetë e lidhur në asnjë mënyrë me shpërthimin e veçantë të hantavirusit që tërhoqi vëmendjen ndërkombëtare javën e kaluar.
