Dy ngjarje të ndara në Gjilan përfunduan me tre persona të vrarë.
Të premten, në Livoç të Ulët, një burrë dyshohet se vrau bashkëshorten dhe vëllain e saj.
Pas ngjarjes, ai u vetëdorëzua në Polici.
Dy ditë më vonë, një tjetër vrasje u raportua në Pogragjë.
Baba dyshohet se vrau djalin e tij e I dyshuari ende ndodhet në arrati.
Sociologu Jahir Sumiqi tregon disa nga faktoret qe po qojnë drejtë vrasjeve
“Problemet ekonomike mungesa e dialogut mungesa e funksionimit të institucioneve relevante pra janë një zinxhir problemesh që po çojnë drejt vrasjeve….”, ka thënë Sumiq.
Të dhënat e Policisë së Kosovës, të siguruara nga TEVE1, tregojnë se nga janari deri në shtator të këtij viti janë evidentuar 17 raste të vrasjeve.
“Gjatë periudhës së nëntëmujorit të këtij viti (janar-shtator), janë evidentuar: 3 vrasje, 12 vrasje të rënda dhe 2 vrasje nga pakujdesia, gjithsej 17 raste”, thuhet në njoftimin e Policisë së Kosovës.
Ndërkaq, specialisti i psikologjisë klinike, Ilir Havolli, thotë se kërcënimet dhe sjelljet e mëparshme të dhunshme janë shenja paralajmëruese që nuk duhet të neglizhohen.
“Shenjat paralajmëruese për një sjellje të dhunshme janë kërcënimet, dhuna e mëparshme, përndjekja, kontrolli i tepruar, xhelozia ekstreme dhe xhelozia për hakmarrje. Janë shenja që nuk mund të neglizhohen, sidomos kur sjelljet përshkallëzohen. Atëherë ekziston rreziku real dhe nevojitet ndërhyrje e menjëhershme”, tha Havolli.
Havolli thekson se parandalimi kërkon identifikimin e shkaqeve të dhunës, edukimin emocional dhe qasjen në shërbimet psikologjike.
“Parandalimi fillon me identifikimin e shkaktarit të dhunës, edukimin emocional dhe qasjen në shërbimet psikologjike, ndërsa kur ka kërcënime serioze, duhet të aktivizohen institucionet përgjegjëse dhe të sigurohet mbrojtja e personit në rrezik”, u shpreh tutje Havolli.
Ndërkohë, gjatë vitit 2025, në Kosovë u regjistruan gjithsej 17 raste të vrasjeve.
