Janë emblemat e tri fazave të Ushtrisë së Kosovës.
E pjesë e gjithë këtij rrugëtimi, ishte Sejdi Ahmeti nga Dardania e Ferizajt.
Fillimisht, majori në pension, iu bashkua Ushtrisë Çlirimtare të Kosovës.
E më transformimin e saj, u bë pjesë edhe e Trupave Mbrojtëse.
Në vitin 2009, TMK u shndërrua në Forcën e Sigurisë së Kosovës.
Në 17-vjetorin e shuarjes së TMK-së dhe kalimit të saj në FSK, Ahmeti thotë se i ka ende të freskëta momentet e asaj kohe.
Por, pse ky proces ishte i dhimbshëm për ish-ushtarakun?
“Që të gjithë pjesëtarët kanë qenë të udhëzuar prej komandantëve të lartë që aplikojnë, procedura e aplikimit ka qenë e njëjtë sikur për civilët sikur për ne, civilët më vonë kanë aplikuar. Dmth pse ka qenë proces shumë i dhimbshëm? Për faktin se asnjë nga ne nuk e kemi ditë se ku do të përfundojmë të nesërmen, kur kihet parasysh se komplet ajo strukturë po flas për batalionin 16 gardistë vetëm një pjesëtar nuk ka apliku prej TMK-së për FSK”, ka thënë Ahmeti.
Ahmeti shton se menjëherë kishte nisur puna që të ngritët niveli i ushtarëve të ardhshëm të Kosovës.
“Secili pjesëtar i TMK-së që është përzgjedhë për të qenë pjesëtar i FSK-së ka qenë i përzgjedhur me kusht në mënyrë që suksesshëm ta përfundojë këtë stërvitje ushtarake bazë apo kursin bazik siç i kanë thënë. Për pjesëtarët e TMK-së që kanë kaluar në FSK ka qenë katër javë, me përjashtim të neve që ishim edhe si instruktorë që i kemi pasë 4+6 pra 10 javë katër javë trajnimin bazik, gjashtë javë trajnimin për instruktorë në mënyrë që me u kompletu taman si strukturë”, u shpreh tutje Ahmeti.
Majori në pension ndau më Tëvë1 momentin kur për herë të parë u gjend para rekruteve të FSK-së.
“Ishte një emocion i mirë dhe ndjenjë fort e fuqishme pasi na i dhanë neve kompetencat NATO-ja për atë 25 për qindëshin, për faktin se ne pritshim tash për herë të parë gjeneratën e parë të të rinjve që ishin rekrutuar nga mosha 18 deri 25 vjet, kjo ka qenë ndjenjë shumë e mirë për ne për faktin se ne shihnim se po ndërtojmë një institucion tamam, po futen të rinjtë dhe kemi pritë gjeneratën e parë kanë qenë 17 rekrutë”, ka përfunduar Ahmeti
Major Ahmeti deri në vitin 2023 ka shërbyer si komandant në Qendrën e Stërvitjeve bazikë në Forcën e Sigurisë.
