Në kundërshtim me të drejtën ndërkombëtare nuk ishte.
Kështu vlerësoi më 22 korrik 2010 Gjykata Ndërkombëtare e Drejtësisë në Hagë, duke konfirmuar se akti i shpalljes së pavarësisë më 17 shkurt 2008 nuk kishte shkelur normat e së drejtës ndërkombëtare.
Me dhjetë vota pro dhe katër kundër, gjyqtarët e GJD-së vendosën në favor të Kosovës, plot 16 vite më parë.
Procesi në këtë gjykatë kishte nisur pas kërkesës së Serbisë, e cila përmes Asamblesë së Përgjithshme të Kombeve të Bashkuara kërkoi vlerësim juridik për ligjshmërinë e shpalljes së pavarësisë së Kosovës.
Ehat Miftaraj nga Instituti i Kosovës për Drejtësi tregon pse Kosova e fitoi këtë rast.
“Kosova, si të themi, e ka fituar këtë rast për arsye shumë të thjeshta sepse pyetja që është dërguar nga Serbia ka qenë pyetje e hartuar jashtëzakonisht keq, e cila ia ka lehtësuar sadopak punën GJND-së për të marrë vendimin që e ka marrë”, shprehet Miftaraj.
Ai tha se ky vendim shkoi në favorin e Kosovës në disa aspekte.
“Në një farë mënyre u delegjitimua kërkesa e Serbisë apo ofensiva e saj që shpallja e pavarësisë së Kosovës ishte në kundërshtim me rendin botëror, dhe e dyta ishte një legjitimim i shteteve të cilat kishin lobuar dhe lobojnë për njohje të reja”, shpjegon ai.
Kësisoj, njohësi i marrëdhënieve ndërkombëtare, Elbasan Osmani, thotë se ky vendim i gjykatës ishte i rëndësisë së lartë për shtetin e Kosovës.
“Inkurajoj një numër të madh të shteteve që të njohin pavarësinë e Kosovës, pra ky akt llogaritet si një moment i rëndësishëm politik e diplomatik për vet shtetësinë e Republikës së Kosovës”, thotë Osmani.
Ushtruesja e detyrës së Presidentes së Republikës së Kosovës, Albulena Haxhiu, theksoi se edhe pas 16 vitesh, opinioni i 22 korrikut 2010 mbetet një nga gurthemelet e legjitimitetit ndërkombëtar të shtetësisë së Kosovës dhe një referencë e rëndësishme në afirmimin e subjektivitetit të saj në arenën ndërkombëtare.
Ndërkohë kryeministri në detyrë Albin Kurti tha se ky vendim forcoi subjektivitetin ndërkombëtar të Kosovës dhe riafirmoi se e drejta ndërkombëtare duhet të shërbejë për paqen, lirinë dhe vetëvendosjen demokratike.
