Vetëm në 24-orshin e fundit, tre persona u raportuan si të zhdukur në Kosovë. E Policia e Kosovës bën të ditur se përgjatë gjithë vitit u raportuan 152 raste të tilla. Por cilët janë faktorët sociologjik që ndikojnë në zhdukjen e tyre?
Në orët e vona të natës u nisën drejt Thethit.
Atje, skuadra e Kërkim Shpëtimit Malor të Kosovës u ndihmuan institucioneve shqiptare në evakuimin e një alpinisteje të huaj.
Ajo dyshohej se ishte vetaksidentuar gjatë ngjitjes në majat e çarkut të Shkodrës.
Kështu, ekipi kosovar ndihmoi në gjetjen dhe tërheqjen e viktimës nga ajo zonë.
Operacione të tillë, Shërbimi i Kërkim Shpëtimit malor kryen edhe në Kosovë.
Gjatë këtyre muajve, ky ekip ka gjetur 13 persona të raportuar si të zhdukur.
“Vjen kërkesa nga ana e familjarëve, kontaktohet policia, mandej në bazë të policisë marrim detajet e para si psh çfarë ka veshur personi kohën e fundit, ku është pa herën e fundit personi në fjalë. Mandej kontaktohet ana e telekomit, a ka qenë diku telefoni i tij dhe pastaj bëhet një plan strategjik se qysh dojmë me fillu veprimin. Për momentin nga ana e familjarëve që na është kërku ndihma, ku kemi marrë pjesë ka qenë 13 persona”, ka deklaruar vullnetari i Shërbimit të Kërkim-shpëtimit malor të Kosovës, Ilir Zhegrova.
Ndërsa vetëm këtë vit, në vend u raportuan 152 raste të personave të zhdukur.
“Referuar kërkesës suaj të mëposhtme ju informojmë se në vijim keni statistikat e rasteve të personave të zhdukur për periudhën kohore Janar-Shtator 2023”, kanë deklaruar nga Policia e Kosovës.
• 152 raste të raportuara
E në zhdukjen e personave ndikojnë faktorë të ndryshëm.
Megjithatë në Kosovë sipas sociologëve faktori më i shpeshtë i zhdukjes së personave është dhuna familjare.
“Faktori kryesor është dhuna domestike apo dhuna familjare, mundet me qenë potencial – viktimë e ndonjë krimi, pastaj janë faktorët mental-psikologjik dhe miskomunikimi. Kemi disa raste ku varësisht prej moshës dhe gjinisë kemi persona të cilët pas një jave apo dhjetë ditëve lajmërohen po për shkak të ndonjë lidhjeje të fshehtë apo lidhje të cilën e mbajnë t’u mos e ditë familja”, është shprehur sociologu, Genc Xërxa.
Vetëm brenda 24 orëve, nga Policia e Kosovës u raportuan tre raste të personave të zhdukur, në Pejë, Gjakovë dhe Leposaviq.
