Pesëmbëdhjetë zyrtarë korrektues të Kosovës kanë përfunduar me sukses një trajnim të avancuar gjashtëmujor në Danimarkë, duke u certifikuar në një ceremoni zyrtare të mbajtur në Kopenhagë.
Sipas njoftimit zyrtar, në ceremoninë e certifikimit morën pjesë Zëvendësdrejtori i Përgjithshëm i Shërbimit Korrektues të Kosovës, Ridvan Hoti, Kryeinspektori Muamer Bikliqi, Ministri i Drejtësisë i Danimarkës, Peter Hummelgaard, Drejtoresha e Shërbimit Danez të Burgjeve, Ina Eliasen, si dhe përfaqësues të tjerë institucionalë nga të dy vendet.
Gjatë fjalës së tij, Hoti theksoi se ky certifikim përfaqëson suksesin e një grupi profesionistësh korrektues nga Kosova, të cilët me përkushtim dhe seriozitet kanë përfunduar një trajnim të avancuar në sistemin korrektues danez.
Ai e cilësoi këtë përvojë si një mundësi të rëndësishme profesionale dhe njerëzore, e ndërtuar mbi vlera si respekti, përgjegjësia dhe profesionalizmi.
Zëvendësdrejtori i Përgjithshëm vlerësoi gjithashtu marrëveshjen ndërmjet Kosovës dhe Danimarkës për akomodimin e të burgosurve danezë në Burgun e Gjilanit, duke e konsideruar atë një partneritet unik dhe të besueshëm, që dëshmon besimin e Danimarkës në kapacitetet dhe standardet e Shërbimit Korrektues të Kosovës.
Nga ana e tij, Ministri i Drejtësisë i Danimarkës, Peter Hummelgaard, uroi zyrtarët korrektues kosovarë për përfundimin e suksesshëm të trajnimit dhe theksoi rëndësinë e këtij procesi në kuadër të zbatimit të marrëveshjes ndërmjet dy vendeve.
Ai nënvizoi se projekti mbetet prioritet i lartë dhe se pritet që edhe grupe të tjera zyrtarësh nga Kosova të përfshihen në trajnim.
Drejtoresha e Shërbimit Danez të Burgjeve, Ina Eliasen, tha se trajnimi i zyrtarëve korrektues nga Kosova është thelbësor për përgatitjet para vënies në funksion të burgut, duke vlerësuar përkushtimin e grupit të parë dhe bashkëpunimin ndërinstitucional ndërmjet dy vendeve.
Trajnimi gjashtëmujor përfshiu njohuri mbi sistemin korrektues danez, menaxhimin e burgjeve dhe kulturën institucionale, duke forcuar kapacitetet profesionale të Shërbimit Korrektues të Kosovës.
“Ky sukses dëshmon aftësinë, seriozitetin dhe motivimin e oficerëve tanë korrektues, të cilët vazhdojnë të jenë shembull i përkushtimit ndaj standardeve më të larta profesionale dhe etikës në fushën e menaxhimit të sistemeve korrektuese”, theksohet në njoftim./teve1.info/
