Për herë të fundit doli para gjykatores në Prizren.
Trupi gjykues të premten shpalli aktgjykimin dënues ndaj Ilir Haxhiajt.
Ai u dënua me 15 vite burgim për vrasjen e gruas së tij pranverën e vitit 2019.
“Gjykata konform dispozitave të nenit 7/17 të nenit 42, 69, 79 në lidhje me nenin 86 paragrafi 5 lidhur me paragrafin 1 të kodit penal të Republikës së Kosovës e gjykon me dënim me burgim me kohëzgjatje prej 15 viteve në të cilën dënim me burgim do t’i llogaritet edhe koha e kaluar në paraburgim”, tha gjyqtari Ajser Skenderi.
Ky aktgjykim u mor pasi që të njëjtit fillimisht i ishte shqiptuar masa e njëjtë por që rasti ishte kthyer në rigjykim.
E avokati i viktimës thotë se edhe pse rasti u kthye në rigjykim nga Gjykata Supreme, nga trupi gjykues është trajtuar profesionalisht.
“Gjykata Themelore e Prizrenit në mënyrë profesionale edhe pas kthimit të çështjes në rigjykim me rekomandim të Gjykatës Supreme se e njëjta duhet të zbatojë të gjitha këto rekomandime duke dalë në vendin e ngjarjes duke bërë rikonstruimin e vendit të ngjarjes si dhe duke zbatuar duke analizuar të gjitha provat mjeko-ligjore dhe të komunikacionit të ekspertëve e njëjta në mënyrë profesionale ka arritur të administrojë të gjitha këto prova”, tha avokati i viktimës, Zahir Hamza.
Derisa shton se është i kënaqur me dënimin që është shqiptuar nga organi gjyqësor, ku siç thotë ai është meritor për kryerësin e veprës.
“Si përfaqësues i viktimës në këtë rast Hatije Dina jam munduar në forma të ndryshme në aspektin juridik dhe profesional që të jem prezent çdo fazë të kësaj çështje edhe pas rigjykimit të çështjes që mendimi im është që dënimi prej 15 vitesh burgim ndaj të akuzuarit është vendim i bazuar në provat që janë në aktakuzë dhe një vendim meritor”, tha Hamza.
Sipas aktakuzës, i pandehuri Ilir Haxhiaj akuzohej se më 31 maj 2019, ka sulmuar fizikisht bashkëshorten e tij, ku si pasojë e dëmtimeve në kokë, fytyrë, gjoks, shpinë dhe duar, Hatije Dina kishte vdekur në Qendrën Klinike Universitare në Prishtinë.
