Agjencia e Menaxhimit Emergjent (MPB) ka njoftuar se aktualisht në Kosovë janë 15 vatra aktive të zjarrit në sipërfaqe të hapura fushore dhe malore.
Sipas njoftimit, këto zjarre janë aktive fshatin Rashan të Mitrovicës, në fshatin Llaushe të Skenderajt, në fshatin Shkukës të Gjakovës, në fshatin Burrnik të Ferizajt, në fshatin Ujmir të Klinës, në fshatin Trebice të Leposaviqit, në fshatrat Batllavë, Belloshë, Hërticë të Podujevës, në fshatin Jesenovik të Novobërdës.
Ndërkaq, zjarret të cilat janë lokalizuar një ditë më parë sipas Agjencisë janë në komunën e Malishevës, Shtimes dhe Podujevës.
“Njësitë e zjarrfikëse dhe shpëtimit të ndihmuar nga qytetarët vullnetarë, janë në intervenim, nuk ka humbje të jetëve të njerëzve, deri sa janë evidente dëmet materiale”, thuhet në njoftim.
Agjencia, me qëllim të parandalimit të rrezikut nga zjarret në rritje më tej ka apeluar te qytetarët shmangien e ndezjeve të zjarreve në ambiente të hapura dhe raportimin e menjëhershëm të çdo vatre të dyshuar në numrat emergjentë pa pagesë : 112, 193, 192.
“Agjencia për Menaxhimin Emergjent po monitoron situatën në vazhdimësi dhe do të informojë publikun me njoftime të rregullta”, theksohet në njoftim.
